झापा ।  पूर्वीनाका काँकरभिट्टाबाट चालु आर्थिक वर्षको ६ महिनामा १४ अर्ब ५६ करोड ६३ लाख रुपैयाँ बराबरको कृषिजन्यवस्तु निर्यात भएको छ । 

प्लान्ट क्वारेन्टिन तथा विषादी व्यवस्थापन केन्द्र क्वारेन्टिन कार्यालयका सूचना अधिकारी चन्द्रेश्वर ठाकुरका अनुसार निर्यात हुने मुख्य वस्तुमा अलैँची, चिया, प्लाइ तथा भेनियर, अदुवा, अम्लिसोलगायत रहेका छन् । ६ महिनामा सबैभन्दा धेरै चिया ६ अर्ब ८२ करोड, अलैँची  चार अर्ब २२ करोड ६० लाख, प्लाइ तथा भेनियर  एक अर्ब ९१ करोड १३ लाख रुपैयाँ मूल्य बराबरको निर्यात भएको उहाँले बताउनुभयो । 

यस्तै, अदुवा . २६ करोड १३ लाख, अम्लिसो  ४९ करोड ७४ लाख, बन्दा रआठ करोड १७ लाख, जडीबुटी दुई करोड ६३ लाख मसुरो दाल एक रोड ५५ लाख मूल्यको निर्यात भएको छ ।  सूचना अधिकारी ठाकुरले सोही अवधिमा पूर्वी नाकाबाट एक अर्ब ९६ करोड ६७ लाख ५० हजार रुपैयाँ  मूल्य बराबरको कृषिजन्य मालवस्तु आयात भएको जानकारी दिनुभयो । 

आयात हुने मुख्य वस्तुमा कोदो, गेँडागुडी दलहन, चामल, ताजा तरकारी, ताजा फलफूल, लसुन, आलु, मकै पशु दानालगायत रहेका छन् । क्वारेन्टिन कार्यालयको तथ्याङ्कअनुसार कोदो  १० करोड ९५ लाख ६८ हजार, चामल ३ करोड तीन लाख, ताजा तरकारी १८ करोड २३ लाख रुपैयँँ मूल्य बराबरको आयात भएको छ । 

यसैगरी ताजा फलफूल २० करोड १८ लाख, लसुन  ६१ करोड ७५ लाख, आलु २१ करोड ७४ लाख रुपैयाँ मूल्य बराबरको आयात भएको क्वारेन्टिन कार्यालयले जनाएको छ ।