काठमाडौँ । जनता समाजवादी पार्टी (जसपा) नेपालले भूमिसम्बन्धी अध्यादेशलाई समर्थन नगर्ने भएको छ । जसपा नेपालले सरकारले ल्याएका विभिन्न ६ अध्यादेश मध्ये  भूमि सम्बन्धीलाई समर्थन नगर्ने निर्णय गरेको छ । 

जसपा नेपालको मंगलबार सिंहदरबारमा बसेको संसदीय दलको बैठकले यस्तो निर्णय गरेको हो । जसपा नेपाल भूमि सम्बन्धी बाहेक अरु बाँकी ५ अध्यादेश अगाडि बढाउने सन्दर्भमा स्वीकृतिका लागि सकारात्मक देखिएको छ । 

जसपा नेपालले सरकारले ल्याएका विभिन्न अध्यादेश अध्ययनको लागि ने उपाध्यक्ष राजकिशोर यादवको नेतृत्वमा कार्यदल बनाएको थियो ।  कार्यदलले अध्ययन पश्चात तयार पारेको प्रतिवेदनको आधारमा यस्तो निर्णय गरेको सांसद प्रकाश अधिकारीले जानकारी दिनुभएको छ ।

‘भूमि सम्बन्धी अध्यादेशमा वन क्षेत्रको जग्गा नोक्सान गर्ने, सार्वजनिक जग्गाको नोक्सान गर्ने प्रावधान छ’ उहाँले भन्नुभयो– ‘भू(माफियाको प्रभाव बढ्न नदिन र जनताको पक्षका लागि यस्तो निर्णयमा पुगिएको हो ।’