काठमाडौँ । इजरायली रक्षामन्त्रालयले कब्जा गरिएको पश्चिमी किनाराको उत्तरमा रहेका ती शरणार्थी शिविरलाई सेनाले ‘खाली’ गरेको जनाएको छ । 

शिबिरमा आगामी एक वर्षसम्म अन्य वस्ती बस्न रोक लगाइएको पनि सेनाले बताएको छ । ‘अहिलेसम्म ४० हजार प्यालेस्टिनीलाई जेनिन, तुलकर्म र नुर शम्सको शरणार्थी शिविरबाट बाहिर निकालिएको छ’  इजरायली रक्षामन्त्री इजरायल काट्जले जारी गरेको विज्ञप्तिमा भनिएको छ।

उहाँले भन्नुभयो– ‘मैले सेनालाई खाली शिविरमा लामो समयको उपस्थितिको लागि तयारी गर्न र त्यहाँका बासिन्दाको फिर्ती र आतङ्कवादको पुनरुत्थान रोक्न निर्देशन दिएको छु।’

यसअघि, इजरायली प्रधानमन्त्री बेन्जामिन नेतन्याहूले हमासले बन्धक रिहाइका समय गर्ने ‘अपमानजनक समारोह’ रोक्ने प्रतिवद्धता नआएसम्म गाजा युद्धविराम सम्झौताअन्तर्गत प्यालेस्टिनी कैदीको सातौँ समूहको रिहाइ प्रक्रिया ढिलो हुने बताउनुभएको छ ।

सम्झौता अन्तर्गत सशस्त्र इस्लामिक लडाकू समूह (हमास) ले शनिबार बन्धकको रिहाइ प्रक्रिया अन्तर्गत सातौ समूहका छ बन्धकको रिहाइ गरिसकेको छ ।

बदलामा इजरायलले ६ सय प्यालेष्टिनी बन्दीलाई शनिबार नै रिहा गर्ने सहमति भएपनि बन्धक रिहाइका समय हमासले गरेका ‘समारोह’ले हमासले बन्धक बनाएका इजरायली नागरिकको अपमान भएको भन्दै इजरायलले बन्दी रिहा गर्न ढिलाई गरेको छ । एजेन्सी