काठमाडौँ । काठमाडौँको गोंगबुबाट एक व्यक्ति स्रोत नखुलेको करिब ४ करोड रुपैयाँ घरमा लुकाइएको अवस्थामा पक्राउ परेका छन् । 

काठमाडौं महानगरपालिका–२६ गोंगबुबाट ७७ वर्षीय विनोदकुमार श्रेष्ठ स्रोत नखुलेको ३ करोड ७५ लाख रुपैयाँसहित पक्राउ परेका हुन् ।  काठमाडौं उपत्यका प्रहरी कार्यालय रानिपोखरी र जिल्ला प्रहरी परिसर काठमाडौंबाट खटिएको विशेष टोलीले श्रेष्ठलाई उल्लेखित रकमसहित पक्राउ गरेको हो । 

श्रेष्ठले आफ्नै घरमा अवैध करिब चार करोड राखेको छ भन्ने सूचना पाएर छापामार्दा उनलाई उल्लेखित रकमसहित पक्राउ गरिएको उपत्यका प्रहरी कार्यालय रानिपोखरीका एसएसपी तथा प्रवक्ता शेखर खनालले बताउनु भएको छ । त्यो रकम श्रेष्ठले कहाँबाट ल्याए, के प्रयोजनाका लागि राखे भन्नेबारे प्रहरीले केही खुलाएको छैन ।

श्रेष्ठको घरबाट सुनका गरगहना समेत बरामद गरिएको  छ । पक्राउ परेका श्रेष्ठको गोरखामा पनि घर रहेको पाइएको छ ।