काठमाडौँ । पूर्वप्रधानमन्त्री तथा नेकपा एकीकृत समाजवादीका अध्यक्ष  माधवकुमार नेपालले  विद्यार्थीलाई उत्पादनसँग जोड्ने पाठ्यक्रम बनाएर त्यसको कार्यान्वयन गर्नुपर्ने बताउनुभएको छ । 

अध्यक्ष नेपालले आइतबार शंखरारापुर नगरपालिका–१ स्थित चाँपाबोट माध्यमिक विद्यालय भवनको अनुगमन गर्दै सामुदायिक विद्यालयले गुणस्तरीय शिक्षाका अतिरिक्त विद्यार्थीलाई उत्पादनसँग जोड्ने पाठ्यक्रम बनाएर त्यसलाई  कार्यान्वयनमा लग्नुपर्ने धारणा व्यक्त गर्नुभएको हो ।

काठमाडौँ क्षेत्र नम्बर २ लाई कहिले प्रत्यक्ष रुपमा राजनीतिक कार्यथलो बनाएर र कहिले अप्रत्यक्षमा रहेर पनि निरन्तर सहयोग तथा योगदान गर्दै आउनुभएका नेपालले चाँपाबोट माविको अवस्था अवलोकन गर्नुभएको छ । 

त्यही क्रममा अध्यक्ष नेपालले केही सामुदायिक विद्यालयले राम्रो पढाइ सञ्चालन गरेकाले भर्ना पाउन प्रतिस्पर्धा हुने गरेको जनाउँदै व्यावसायिक शिक्षाले विद्यार्थीको सिर्जनशील कार्यमा आत्मविश्वास बढ्ने बताउनुभयो ।

अध्यक्ष नेपालले  अब्बल जनशक्ति उत्पादन गर्ने शिक्षण संस्थाको स्तरोन्नतिमा सरकारले लगानी वृद्धि गर्नुपर्नेमा जोड दिनुभयो । उहाँले विद्यालय संरचना विकास तथा भवन मर्मतका लागि सम्बन्धित निकायमा आफूले पहल गर्ने प्रतिबद्धतासमेत व्यक्त गर्नुभयो ।

अध्यक्ष नेपाललाई विद्यालय प्रधानाध्याक हरिबहादुर गौतम, सहायक प्रधानाध्यापक तेजनाथ दङ्गाललगायत शिक्षक तथा वडाध्यक्ष बाबुराम दङ्गाल, वडा सदस्य भूमिप्रसाद दङ्गाल र रामकृष्ण ढुङ्गानाले विद्यालयको गतिविधि बारेमा जानकारी गराउनुभएको थियो । २०७२ सालको विनासकारी भूकम्पले क्षति भएको विद्यालयको केही भाग मर्मत तथा पुनः निर्माण गरिएको छ ।