काठमाडौँ । नेकपा एमालेका अध्यक्ष केपी शर्मा ओली  र  पार्टी निलम्बित विन्दा पाण्डेबीच भेटवार्ता भएको छ । प्रधानमन्त्री ओली र एमालेको स्थायी कमिटीबाट निलम्बित पाण्डेबीच मगलबार करिब ४५ मिनेट भेटवार्ता भएको हो । 

सोमबार, अर्थात् नयाँ वर्षको पहिलो दिन प्रधानमन्त्री ओलीले कतिपय नेताहरुलाई आफैंले फोन गरेर शुभकामना दिनुभएको थियो त्यही क्रममा ओलीको फोन उठाउनेमध्ये एक हुनुहुन्थ्यो पार्टी निलम्बित पाण्डे । 

ओलीले डायल गरेको वैशाख १ को फोनले पाण्डेलाई वैशाख २ अर्थात् भोलिपल्ट मंगलबार प्रधानमन्त्रीको सरकारी निवास बालुवाटार पुर्‍यायो । पाण्डे दिउँसो १ बजे एक्लै पार्टी अध्यक्ष तथा प्रधानमन्त्री भेट्न पुग्नुभएको हो । 

‘६ महिना भइसक्यो, न निलम्बनकै चिठी पाइयो, न फुकुवाकै,’ पाण्डेले प्रधानमन्त्री ओलीसँग राखेको विषय सुनाउँदै एमाले स्रोतले भन्यो ।ओलीले अहिलेसम्म यसबारे जानकारी नगरिएकामा अनौठो मान्नुभयो । उहाँले पुरानो वर्षका तितामिठा विर्सेर पार्टी काममा लाग्न आग्रह गर्नुभएको छ ।