काठमाडौँ । प्रधानमन्त्री तथा  नेकपा माओवादी केन्द्रका अध्यक्ष पुष्पकमल दाहाल प्रचण्डकोपूर्व सुरक्षा गार्डले आत्महत्या गरेका छन् । सशस्त्र द्वन्कालमा माओवादी सेनाको कमान्डर समेत रहेका तुलासिंह भुल ‘जटिल’ले भारतको महाराष्ट्रस्थित उरन शहरमा आत्महत्या गरेका हु्न्  ।

अछामको पञ्चदेवल विनायक नगरपालिकाको लयाटी स्थायी घर भएका  ४५ वर्षीय जटिल रोजगारीको सिलसिलामा उरन शहरमा थिए । जटिलले शनिबार राति आफ्नै कोठामा आत्महत्या गरेको पारिवारिक स्रोतले बताएको छ । 

जटिल  सशस्त्र द्वन्कालमा माओवादी सेनाको सतौँ डिभिजन अन्तरगत लोकेश स्मृति ब्रिगेड अन्तरगतको दुई नम्बर बटालियन सहकमान्डर थिए ।  उनी माओवादी १० वर्षे सशस्त्र युद्ध बाट विश्राम लिएर शान्ति प्रक्रियामा आइसकेपछि करिब एक वर्ष प्रचण्डको सुरक्षा गार्ड बसेका थिए ।  

शान्ति प्रक्रियापछि माओवादी सेनाको उचित व्यवस्थापन नगरेकोमा उनी नेतृत्वप्रति असन्तुष्ट थिए । पारिवारिक स्रोतका अनुसार करिब एक वर्ष अघि जटिलका छोरा कमलको भारतमा सवारी दुर्घटनामा मृत्यु भएको थियो । त्यसपछि उनीमा मानसिक स्वास्थ्य समस्या देखिएको थियो ।