काठमाडौँ ।  संस्कृति, पर्यटन तथा नागरिक उड्डयनमन्त्री सुदन किराँतीको अभिव्यक्तिविरुद्ध प्रदर्शन  हुन थालेको छ । मन्त्री किराँतीले क्रिश्चियन ‘धर्मविरोधीलाई जेल हाल्नुपर्छ’ भन्ने भनाई व्यक्त गरेपछि त्यसको विरोध हुन थालेको  हो । 

 त्यही अभिव्यक्तिलाई लिएर राष्ट्रिय प्रजातन्त्र पार्टीको भ्रातृ संगठन नेपाल सनातन धर्म संस्कृति संगठनले बिहीबार मन्त्री  मन्त्री किराँतीको राजीनामा माग्दै प्रदर्शन गरेको छ ।  विरोध प्रदर्शनमा सहभागीहरुले ‘गैरजिम्मेवार मन्त्री बर्खास्त गर, सुदन किराँती राजीनामा दे, धार्मिक क्षेत्रमा गैरधार्मिक नियुक्ति बन्द गर’ लगायतका प्लेकार्ड बोकेर नाराबाजी गरेका थिए ।

मन्त्री किराँतीले बुधबार आयोजित एक कार्यक्रममा क्रिश्चियनलाई नमान्नेहरु संविधान विरोधी भएको र उनीहरुलाई जेल हाल्नुपर्ने भनाई व्यक्त गर्नुभएको थियो । त्यसपछि उहाँको सर्वत्र विरोध हुन थालेको हो ।  

नेपाल सनातन धर्म संस्कृति संगठनका अध्यक्ष पुष्पराज पुरुषले देशको बहालवाला मन्त्रीले कुनै समुदायको कार्यक्रममा गएर अरु समुदायलाई निन्दा गर्दै एउटा समुदायलाई उचाल्नु गलत भएको बताउनुभयो । मन्त्री किराँतीले ‘सामाजिक सद्भाव बिगार्ने’ काम गरेको र उहाँलाई ‘बर्खास्त गर्नुपर्ने’ प्रदर्शनकारुकिो माग रहेको छ । 

प्रदर्शनकारीले पशुपति क्षेत्र विकास कोषमा भएका पछिल्ला नियुक्तिमाथि पनि प्रश्न उठाएका छन्  । धार्मिक क्षेत्रमा गैरधार्मिक व्यक्तिहरुको नियुक्ति बन्द गर्नुपर्ने र धार्मिक क्षेत्र पार्टीका कार्यकर्ता भर्ती केन्द्र बनाइनु नहुने उनीहरुको माग छ । पशुपति क्षेत्र विकास कोषको कार्यकारी निर्देशकमा बुधबार मा‌ओवादी केन्द्र निकटकी लक्ष्मी पुन नियुक्त हुनुभएको थियो ।