काठमाडौँ ।  फिफा क्लब विश्वकप फुटबलमा प्रिमियर लिग क्लब म्यानचेस्टर सिटी फाइनलमा प्रवेश गरेको छ । साउदी अरेबियाको जेदाहमा भइरहेको  मंगलबारको खेलमा म्यानचेष्टर सिटीले जापानिज  क्लब उरावा रेड डायमण्डलाई ३–० ले पराजित गर्दै फाइनलमा स्थान पुगेको हो । 

जेहास्थित किङ अब्दुलल्ह स्पोर्ट्स सिटीका भएको खेलको पहिलो हाफमा मारिउस होइब्रातेनले आत्मघाती गोल गरेपछि सिटीले अग्रता लिएको हो ।  दोस्रो हाफमा सिटीले दुई गोल थप्यो । माटेओ कोभासिसले ५२औं र बर्नार्डो शिल्भाले ५९औं मिनेटमा गोल गरे । त्यसले म्यानचेष्टर सिटीलाई सफलता दिलाएको हो । सिटीले उपाधिका लागि दक्षिण अमेरिकी महादेशको च्याम्पियन फ्लुमिनेन्ससँग आउने शुक्रबार खेल्नेछ । ब्राजिलियन फ्लुमिनेन्सले पहिलो सेमिफाइनलमा अल अहलीलाई २–० ले हराएर फाइनलको स्थान सुरक्षित पारेको छ । 
पहिलो क्लब बक्लब विश्वकप खेलिरहेको सिटी उपाधि जित्ने चौथो इंग्लिस क्लब बन्ने अभियानमा छ । यसअघि इंग्ल्याण्डका म्यानचेष्टर युनाइटेड, चेल्सी  र लिभरपुलले उपाधि जितेका छन् । सिटीका म्यानेजर पेप ग्वार्डिओलाले यसअघि बार्सिलोना र बायर्न म्युनिखबाट फिफा क्लब विश्वकपको उपाधि जितिसकेका छन्  । उनलाई तेस्रो फरक क्लबबबाट उपाधि जित्ने अवसर छ ।