रुकुम । भूकम्प प्रभावित क्षेत्र रुकुमपश्चिमका संचारकर्मीलाई पत्रकार महासंघले आर्थिक सहयोग गरेको छ । महासंघको टोली बुधबार मुसिकोट खलङ्गामा पुगेर भूकम्प प्रभावित पत्रकारलाई ४ लाख रुपैयाँको चेक हस्तान्तरण गरेको हो । 

महासंघकाका वरिष्ठ उपाध्यक्ष रमेश विष्ट, महासचिव रोसन पुरी, कोषाध्यक्ष कलेन्द्र सेजुवालले  जिल्ला अध्यक्ष लक्ष्मण केसीलाई चेक हस्तान्तरण गर्नुभएको छ । प्रभावित क्षेत्रका पत्रकारलाई आर्थिक रुपमा थोरै भए पनि सहयोग पुगोस् भन्ने उद्देश्यले महासंघले संकलन गरेको रकम हस्तान्तरण गरिएको महासचिव पुरीले जानकारी दिनुभयो । भूकम्प गएदेखि प्रभावित क्षेत्रमा खटिने पत्रकारको बारेमा जानकार रहेको बताउँदै उहाँले आउँदा दिनमा थप सहयोग गर्न महासंघ तयार रहेको बताउनुभयो । 

प्रभावित क्षेत्रका पत्रकारको आवश्यकता आधारमा क्षमता विकास तालिम, आवश्यक समन्वय गर्न महासंघसधैँ साथमा रहेको वरिष्ठ उपाध्यक्ष बिष्टले बताउनुभयो । प्रभावित क्षेत्र जाजरकोट र रुकुम पश्चिमको पत्रकारिता पेशालाई थप अगाडि बनाउन यहाँबाट फर्केर महत्त्वपूर्ण निर्णय गर्ने उहाँको भनाई छ। । उहाँका अनुसार प्रभावित पत्रकारलाई न्यायोचित ढङ्गले रकम वितरण गर्न पत्रकार महासङ्घ रकुम पश्चिमलाई आग्रह गरिएको छ ।

महासंघबाट प्राप्त भएको रकम न्योयोचित ढङ्गले वितरण हुने जिल्ला अध्यक्ष केसीले बताउनुभयो । उहाँका अनुसार  प्राप्त भएको रकम वितरण गर्न कार्यदल निर्माण गरिएको र कार्यदलको निर्णय अनुसार केही दिनभित्र वितरण गरिने छ । 

महासंघको टोलीले भूकम्प प्रभावित जाजरकोट र रुकुम पश्चिममा ४÷४ लाख रुपैयाँ सहयोग गरेको जनाएको छ ।