दार्चुला ।  दार्चुलाको मालिकार्जुन गाउँपालिकाले दुईवटा वडालाई बालविबाह मुक्त वडा घोषणा गर्ने तयारी गरेको छ । पालिकाका ८ वडा मध्ये दुई वडालाई केही दिनभित्रै बालविबाह मुक्त वडा घोषणा गर्ने तयारी भएको गाउँपालिकाले जनाएको छ । 

गत मंसिर २७ गते बसेको मालिकार्जुन गाउँपालिका र गुड नेबर्स इन्टरनेशनल नेपालको समन्वयात्मक बैठकको निर्णय अनुसार पालिकाको नम्बर ६ र २ लाई बालविवाहह मुत्त वडा घोषणा गर्ने तयारी भएको गाउँपालिका प्रमुख प्रशासकिय अधिकृत नरबहादुर ठगुन्नाले जानकारी दिनुभयो । उहाँका अनुसार यहि पुष १० गते वडा नम्बर ६ र पुष ११ गते वडा नम्बर २ लाई बालविबाह मुक्त वडा घोषणा गर्ने तयारी भएको छ । 

यसका लागि पालिकाले सोमबार दुबै वडाहरुमा आवश्यक तयारी गर्न भन्दै सुचना समेत सार्वजनिक गरेको छ । कार्यक्रममा सर्वसाधारण, शिक्षक विद्यार्थी, जनप्रतिनिधि लगायतलाई आवश्यक प्रचार प्रसार गर्न भनिएको छ । अन्य वडाहरु भन्दा यी दुई वडाहरुमा बालविबाह कम हुँदै गएपछि तत्काल यी दुई वडाहरुमा कार्यक्रमको आयोजना गरिएको गुड नेबर्स इन्टरनेशनल नेपाल दार्चुलाले जनाएको छ । 

मालिकार्जुन गाउँपालिकामा गुड नेबर्स इन्टरनेशनल नेपालले बालविबाह अन्त्यका लागि विभिन्न सचेतनामूलक कार्यक्रम काम गदैँ आएको छ । मालिकार्जुन सहित जिल्लाका विभिन्न स्थानीय तहमा अझै पनि बालबिबाह हुने गरेको छ । मालिकार्जुन गाउँपालिकालाई २०८२ साल भित्र बालविबाह मुक्त पालिका बनाउने तयारी भएको गाउँपालिकाले जनाएको छ । स्थानीय रणनीति २०७६ लागु भएपछि मालिकार्जुनमा गुड नेबर्स इन्टरनेशनल नेपालले काम गदैँ आएको छ ।

अहिले पालिकामा बालविबाह गर्नेको संख्या ६ प्रतिशतमा झरेको छ । पहिले पालिकाभरी २५ दशमलब ९६ प्रतिशत हुने बालबिबाह अहिले आएर ६ प्रतिशतमा झरेको गुड नेबर्स इन्टरनेशनल नेपाल दार्चुलाका निमित्त कार्यालय प्रमुख टिकाराम चौधरीले जानकारी दिनुभयो ।