काठमाडौँ । ललितपुरको बालकुमारी घटना जाँचबुझ आयोगले आफ्नो प्रतिवेदन बुझाएको छ । 

बालकुमारीमा पुस १३ गते प्रहरीको गोली लागेर २ जनाको मृत्यु भएको घटनाबारे अनुसन्धान गर्न सरकारले उच्च अदालतका पूर्वन्यायाधीश शेखरप्रसाद पौडेलकोअध्यक्षतामा जाँचबुझ आयोग बनाएको थियो ।  ईपीएस कोरिया शाखा कार्यालयमा परीक्षा फारम भर्ने विषयलाई लिएर भएको प्रदर्शनमा प्रहरीले गोली चलाउँदा चौरपाटी, अछामका वीरेन्द्र शाह र महाबु, दैलेखका सुजन रावतको मृत्यु भएको घटना छानविन गर्न पुस १६ गठित आयोगमा पूर्व अतिरिक्त प्रहरी महानिरीक्षक अरुण कुमार बीसी र गृह मन्त्रालयका प्रवक्ता एवम् सहसचिव नारायणप्रसाद भट्टराई सदस्य रहनुभएको थियो ।  

आयोगले ४४ दिनमा तयार पारेको प्रतिवेदन शुक्रबार उपप्रधानमन्त्री तथा गृहमन्त्री नारायणकाजी श्रेष्ठलाई बुझाएको हो । उपप्रधानमन्त्री श्रेष्ठले प्रतिवेदन बुझ्दै आयोगले सत्यतथ्य जाँचबुझ गरी मिहिनेतपूर्वक निकालेको निष्कर्षलाई कार्वान्यवन गरिने बताउनुभएको छ । 

आयोगका अध्यक्ष पौडेलका अनुसार घटनास्थलको निरीक्षण गरेको, प्रत्यक्षदर्शी, सञ्चारकर्मी, पीडितका परिवार, घटनाका घाइते, विशेषज्ञ डाक्टर तथा घटनासँग सम्बन्धित अन्यसहित १६ जनाको बयान समेत तयार पारेको छ ।  घटनासँग सम्बन्धित सुरक्षा निकायका पदाधिकारी एवम् अन्य समेत गरी २९ जनासँग बयान लिएर प्रतिवेदन तयार पारिएको अध्यक्ष पौडेलले जानकारी गराउनुभएको छ ।