अर्घाखाँची । धार्मिक पर्यटक आकर्षित गर्न अर्घाखाँचीको पाणिनीमा खुला भजन प्रतियोगिता आयोजना हुने भएको छ । 

फागुन १४ गते महाशिवरात्रिको दिन लायन्स क्लब अफ अर्घाखाँची पाणिनीको आयोजनामा भजन प्रतियोगिता हुने भएको आयोजक संस्थाका अध्यक्ष अर्जुन पोख्रेलले जानकारी दिनुभयो । 

संस्कृत व्याकरण र लोक भजनको उद्गमस्थल मानिने पाणिनी तपोभूमी, दुर्वाशेश्वर गुफालगायतका धार्मिक सम्पदाको संरक्षण र प्रवद्र्धन गरी पर्यटन विकासमा टेवा पु्र्याउने उद्देश्यले प्रतियोगिता राखिएको उहाँको भनाइ छ । 

प्रतियोगितामा प्रथम हुनेलाई ३३ हजार ३ सय ३३, दोस्रो हुनेलाई  २२ हजार २ सय २२, तेस्रो हुनेलाई  ११ हजार १ सय ११ तथा सान्त्वना हुनेलाई ५ हजार ५सय ५५  रुपैयाँ प्रदान गरिने लायन्स क्लबका सचिव घनश्याम पौडेलले जानकारी दिनुभएको छ । धार्मिक क्षेत्रको प्रवर्द्धनका साथै भजन संरक्षणमा समेत यो प्रतियोगिता सहयोगी बन्ने आयोजकको अपेक्षा छ । 

अर्घाखाँचीसहित गुल्मी, पाल्पा, प्यूठान, रुपन्देही, कपिलवस्तु लगायतका जिल्लाबाट भजन मण्डली आउने तयारी रहेको आयोजकले जनाएको छ ।