सर्लाही । मूल्य निर्धारणको माग राख्दै उखु किसान फरि आन्दोलित भएका छन् । चालु यामका लागि उखुको मूल्य निर्धारण र गतवर्ष बिक्री गरेको उखुको अनुदान बापतको रकम भुक्तानीको माग राख्दै किसान आन्दोलित भएका हुन् । 

गतवर्ष उखु बिक्री गरेबापत राज्यले दिनुपर्ने प्रति क्विन्टल ७० रुपैयाँ  मध्ये हालसम्म प्रति क्विन्टल  २१ रुपैयाँ मात्रै भुक्तानी भएको र बाँकी प्रति क्विन्टल ४९ रुपैयाँ अनुदान बापतको रकम एथाशीघ्र  भुक्तानी गर्नुपर्ने उनीहरुको माग छ । 

चालु यामको लागि उखुको मूल्यप्रति क्विन्टल ७ सय ५० रुपैयाँ कायम गराउनुपर्ने उनीहरुको भनाई रहेको छ । मिलगेट उखु उत्पादक समिति सर्लाहीका अध्यक्ष राजकुमार उप्रेतीले उखुका हरिया लाथ्रा प्रदर्शन गरेर गएको शनिबारदेखि  आन्दोलनका कार्यक्रम जारी रहेको जानकारी दिनुभयो । उहाँका अनुसार चालु यामका लागि उखुको मूल्य ७ सय ५०  रुपैयाँ तत्काल तोक्नुपर्ने र गत वर्षको अनुदान बापतको प्रति क्विन्टल  ७० रुपैयाँ मध्ये हालसम्म पनि भुक्तानी हुनबाँकी रहेको प्रति क्विन्टल  ४९ का दरले  ५२ करोड रकम तत्काल भुक्तानी गर्नुपर्ने लगायतका माग किसानको  छ । 

नेपाल उखु उत्पादक किसान महासङ्घका अध्यक्ष कपिलमुनी मैनालीले चालु यामको उखुको प्रति क्विन्टल मूल्य निर्धारण नभएको र अनुदान बापतको राज्यले दिनुपर्ने बाँकी रकम भुक्तानी नभएको  गुनासो गर्नुभयो । उहाँले यस्तो अवस्थामा जिल्लाका उखु उत्पादक किसानले चिनी उद्योग सञ्चालन नगर्नसमेत आग्रह गरेका बताउनुभयो ।