काठमाडौँ । सरकारले उखु किसानलाई भुक्तानी वापत ५२ करोड रुपैयाँ तत्काल उपलब्ध गराउने भएको छ  । 

प्रधानमन्त्री पुष्पकमल दाहालको उपस्थितिमा सरोकारवाला  मन्त्री र सचिवकोआइतबार बसेको  बैठकले उखु किसानको बाँकी भुक्तानी ५२ करोड तत्काल उपलब्ध गराउने निर्णय गरेको छ ।  उखु किसानको बाँकी भुक्तानी रकम तत्काल उपलब्ध गराउने निर्णय भएको प्रधानमन्त्रीका प्रेस संयोजक सूर्य किरण शर्माले जानकारी दिनुभएको छ ।

प्रधानमन्त्रीका प्रेस संयोजक शर्माका अनुसार बैठकमा अर्थमन्त्री डा प्रकाशशरण महत, कृषिमन्त्री डा बेदुराम भुसाल, उद्योग वाणिज्य तथा आपूर्तिमन्त्री रमेश रिजाल, मुख्यसचिव डा बैकुण्ठ अर्याल, अर्थ मन्त्रालय, कृषि मन्त्रालय र उद्योग मन्त्रालयका सचिवहरूलगायत उपस्थित हुनुहुन्थ्यो ।

बैठकमा प्रधानमन्त्रीले कृषि क्षेत्र र किसानलाई प्राथमिकतामा राखेर उत्पादनमुखी नीति, योजना र कार्यक्रम बनाउन एवं कार्यान्वयनमा तत्परता देखाउन मन्त्री र सचिवलाई निर्देशित गर्नुभएको थियो ।