काठमाडौँ । संघीय संसद्को महासचिवको जिम्मेवारी सचिव पद्मप्रसाद पाण्डेयले पाउनुभएको छ । 

प्रतिनिधिसभाका सभामुख देवराज घिमिरेले राष्ट्रियसभाका अध्यक्ष गणेशप्रसाद तिमिल्सनाको परामर्शमा प्रतिनिधिसभाका सचिव पाण्डेयलाई अर्को व्यवस्था नभएसम्मका लागि संसद्को महासचिवको जिम्मेवारी निर्वाह गर्न तोक्नुभएको हो ।

महासचिव डा भरतराज गौतमले मंसिर २४ गतेदेखि लागू हुनेगरी राष्ट्रपति रामचन्द्र पौडेलसमक्ष राजीनामा पेश गर्नुभएको थियो । हरेक वर्ष मंसिर २८ गते संसद् दिवस मनाइने गरिएको छ । 

प्रशासनिक नेतृत्व नहुँदा संघीय संसद् दिवसका सन्दर्भमा गर्नुपर्ने कतिपय कामका साथै लोक सेवाबाट सिफारिस भएर आएका कर्मचारीको नियुक्ति लगायत दैनिक काम प्रभाव परेका कारण सभामुखले पाण्डेयलाई अर्को व्यवस्था नभएसम्मका लागि महासचिवको जिम्मेवारी तोक्नुभएको संसद् सचिवालयले जनाएको छ ।