काठमाडौँँ । यू १९ एसिया कप क्रिकेटमा नेपाल भारतसँग पराजित भएको छ । दुबईको आईसीसीए २ मैदानमा भएको खेलमा नेपाल भारतसँग १० विकेटले पराजित भएको हो । 

जितका लागि पाएको ५३ रनको सामान्य लक्ष्य भारतले बिना क्षति ७.१ ‍ओभरमा भेट्टायो । भारतका लागि ओपनर ब्याटर अर्हिन कुलकर्नीले ४३ बनाए ।  आदर्श सिंहले १३ रन जोडे । खेलमा नेपालले ३ जना बलर प्रयोग गरेको थियो तर जितको परिणाम भने  निकाल्न सकेनन् ।

टस हारेर पहिला ब्याटिङको निम्तो पाएको नेपाल २२.१ ओभरमा ५२ रनमा अल आउट भएको हो । यू १९ क्रिकेटमा नेपालको यो अहिलेसम्म्कै न्यून स्कोर हो । यसअघि नेपाल सन् २००८ मा वेष्टइण्डिज विरुद्ध ७४ रनमा अलआउट भएको थियो ।

नेपालका लागि कुनै पनि ब्याट्सम्यानले दोहोरो अंकमा रन जोड्न सकेनन् । हेमन्त धामीले सर्वाधिक ८ रन बनाए । आकाश चन्द ४ रनमा अविजित रहे । नेपालका लागि टिकेर खेल्ने भर पर्दा ब्याटर अर्जुन कुमाल पनि क्रिजमा लामो समय टिक्न सकेनन् ।

प्रतियोगितामा नेपालको यो तेस्रो हार हो । यसअघि पाकिस्तान र अफगानिस्तानसँग पनि पराजित भएको नेपाल यू १९ एसिया कप क्रिकेटमा समूह चरणबाटै घर फर्केको छ ।