काठमाडौँ ।  अखिल नेपाल फुटबल सङ्घ (एन्फा) को आयोजनामा फागुन २५ गतेदेखि राजधानीमा शहीद स्मारक ‘बी’ डिभिजन लिग फुटबल प्रतियोगिता हुने भएको छ ।

सिङ्गल राउन्ड रोबिनका आधारमा हुने उक्त प्रतियोगितामा कूल ९१  खेल सञ्चालन हुने आज  आयोजित पत्रकार सम्मेलनमा एन्फाका प्रवक्ता सुरेश शाहले जानकारी दिनुभएको छ । उहाँका अनुसार प्रतियोगिता दशरथ रङ्गशाला र सातदोबाटोस्थित एन्फा कम्प्लेक्समा हुनेछ ।

प्रतियोगितामा देशभरका १४ क्लबको सहभागिता रहने छ । जसमा आरसिटी क्लब, श्री भगवती क्लब, टुसाल युथ क्बल, ब्रिगेड व्वाइज क्लब, ब्वाइज युनियन क्लब, मध्यपुर युथ क्लब, च्यासल युथ क्लब र बाँसबारी क्लब सहभागी छन् । 

त्यसैगरी श्रीकुमारी क्लब, नयाँ बस्ती युथ क्लब, सरस्वती युवा क्लब, वीरगञ्ज युनाइटेड क्लब, झापा फुटबल क्बल र प्लानिङ युनाइटेड क्लब रहेका छन् । एन्फाले उक्त प्रतियोगिताको सम्पूर्ण तयारी पूरा भएको जनाएको छ । 

प्रतियोगिताको मार्केटिङ, टिकेटिङ र ब्रोडकास्टिङ अधिकार एमडिएसी स्पोर्टस्लाई प्रदान गरेको छ । प्रतियोगिताको टिकट दर दशरथ रङ्गशालामा साधारण प्याराफिटतर्फ रु एक सय र भिआइपी प्याराफिटतर्फ ३ सय रुपैयाँ तोकिएको छ । त्यस्तै सातदोबाटोमा सामान्य प्याराफिटर्फ एक सय रुपैयाँ कायम गरिएको छ ।

प्रतियोगिताको विजेताले १५ लाख रुपैयाँँ प्राप्त गर्ने छभने उपविजेताले  १० लाख रुपैयाँ पाउने छ । त्यसैगरी तेस्रो हुने टोलीले  पाँच लाख पाउने छ । प्रतियोगितामा फेयर प्ले टिमले  एक लाख, उत्कृष्ट गोलकिपरले  ५० हजार, सर्वाधिक गोलकर्ताले ५० हजार र प्लेयर अफ द म्याच घोषित हुने खेलाडीले  सात हजार पाँच सय रुपैयाँ पाउने छ ।

त्यसैगरी हरेका खेलका विजयी हुने टोलीले  २५ हजार तथा बराबरी भएमा टोलीले  १० हजार पाउने छ । प्रतियोगिताको सञ्चालनका लागि कूल  तीन करोड ९३ लाख एक हजार आठ सय १३ रुपैयाँ लाग्ने आयोजकले जनाएको छ । प्रतियोगिता आगामी जेठ २५ गतेसम्म सञ्चालन हुनेछ ।