काठमाडौँ । प्रमुख प्रतिपक्ष दल नेकपा एमालेका प्रतिनिधिसभा सदस्य सूर्य थापाले उपप्रधानमन्त्री तथा गृहमन्त्री नाराणकाजी श्रेष्ठको राजीनामा माग्नुभएको छ । एमालेका युवा नेता थापाले शुक्रबार ललितपुरको बालकुमारीमा भएको हिंसात्मक घटनालाई लिएर गृहमन्त्री श्रेष्ठको राजीनामा माग्नु भएको हो । 

रोजगार अनुमति प्रणाली (ईपीएस) परीक्षाको विषयलाई दिएर बालकुमारीमा प्रदर्शनमा गरिरहेकाहरुले भौतिक पूर्वाधार तथा यातायातमन्त्री प्रकाश ज्वाला चढेको  बा २ झ ५८६१ नम्बरको गाडी आगजनी गरेपछि घटना हिंसात्मक बनेको हो ।  मन्त्रीको गाडीमा आगजनीपछि प्रदर्शनकारीलाई नियन्त्रण गर्न प्रहरीले लाठीचार्ज, अश्रुग्यास प्रहार र गोली प्रहार गरेको थियो । प्रहरीको लाठीचार्ज र गोली प्रहारबाट डोटीका २२ वर्षीय वीरेन्द्र शाह र दैलेखका २३ वर्षीय सुजन राउतले जीवन गुमाएका छन् । 

घटना छानविन गर्न गृह मन्त्रालयले  उपत्यका प्रहरी कार्यालयका डीआईजी लालमणि आचार्यको नेतृत्वमा छानविन समिति बनाएको छ । एमालेका युवा नेता थापाले सामाजिक संजालमार्फत घटना छानविन गर्न समिति बनाएर मात्र नहुने गृहमन्त्री श्रेष्ठले राजीनामा नै दिनुपर्ने सुझाव दिनुभएको छ । ‘छानविनको नाटक बन्द गर, बेरोजगार युवाको हत्यारा नारनकाजी तत्तकाल राजीनामा गर’ उहाँले सामाजिक संजालमा लेख्नुभएको छ ।