काठमाडौँ ।  निर्वाचन आयोगले  उपचुनाव स्वच्छ र निष्पक्ष बनाउन आग्रह गरेको छ । आयोगले वैशाख १५ गते हुने उपनिर्वाचनलाई स्वच्छ, स्वतन्त्र, निष्पक्ष, विश्वसनीय र मितव्ययी रूपमा सम्पन्न गर्न गराउन नेपाल सरकारलाई सहयोगको आग्रह गरेको हो ।

आयोगले उपनिर्वाचन हुने जिल्लामा विद्युत्, खानेपानी, यातायात, सञ्चार, स्वास्थ्य, दमकल जस्ता सेवा तन्दुरुस्त राख्न र निर्वाचन क्षेत्रमा खटाइएका सुरक्षाकर्मी,  कर्मचारीलाई सुरक्षित कार्य सम्पादन गराउने वातावरण बनाउन सरकारलाई  आग्रह गरेको  हो ।

आयोगका प्रवक्ता शालिग्राम शर्मा पौडेलद्वारा आज जारी विज्ञप्तिमा सम्द्धव निकायबाट कार्यान्वयन गर्ने गराउने गरी आवश्यक सहयोग तथा निर्देशन गर्न नेपाल सरकार, प्रधानमन्त्री तथा मन्त्रिपरिषद्को कार्यालयमा लेखी पठाउने निर्णय गरेको आयोगले जनाएको छ ।

प्रतिनिधिसभा सदस्यको लागि इलाम क्षेत्र नम्बर २ र प्रदेश सांसदको लागि बझाङ १ मा उपनिर्वाचन हुँदैछ । आयोगले उपनिर्वाचन सम्पन्न गर्न गएको चैत २८ गतेदेखि आचारसंहिता लागू गरिसकेको छ ।