सङ्खुवासभा । गुराँस को राजधानी भनिने तीनजुरे–मिल्के–जलजले क्षेत्रमा  वन फडानी रोक्न माग गरिएको छ । दुई वटा सामुदायिक वनमा डोजरले जथाभावी रुख ढलाइ रहेको भन्दै  प्रतिनिधि मण्डलले जिल्ला प्रशासनमा ‘गुराँस वन फँडानी रोकी पाउँ’ भनि निवेदन दिएको हो ।

चैत २८ गते बुधबार तीनजुरे हात्तीसार सामुदायिक वनका उपभोक्ता सूर्जबहादुर तामाङ र लाल सिँ मोक्तानको प्रतिनिधि मण्डलले जिल्ला प्रशासन कार्यालय सङ्खुवासभालाई पत्रलेखि त्यसको बोधार्थसमेत सरोकारवाला अन्य पाँचवटा निकायमा पठाएका छन् । 

कोशी करिडोर २२० केभी प्रशारण लाइन निर्माणका क्रममा सरोकारवाला सामुदायिक वनका उपभोक्तालाई बिनाकुनै जानकारी रुख काटेर गुराँस वन फँडानी गरेको भन्दै उपभोक्ताले आपत्ति जनाएका हुन् । जिल्ला प्रशासन कार्यालयले तीन दिनभित्र गुराँस वनको डोजर हटाउन र रुख कटान बन्द गराउन सामुदायिक वनका उपभोक्ताले माग गरेको निवेदनमा उल्लेख गरिएको छ । माग सुनुवाइ नभए सामुदायिक वनका उपभोक्ता कडा आन्दोलनमा जान बाध्य हुने निवेदनमा लेखिएको छ ।

कोशी करिडोरले बिजुली पोल जडानका लागि आर्थिक वर्ष २०७७/७८ मा ६ सय २९ रुख कटान गर्ने सम्झौता गरेको र यसका लागि करिब १० लाख रुपैयाँ कटान खर्च उपलब्ध गराएको तीनजुरे हात्तीसार सामुदायिक वन उपभोक्ता समितिका अध्यक्ष डम्बरबहादुर बुढाथोकीले बताउनुभयो । सम्झौता भएलगत्तै ६ सय २९ रुख काटिएको भए पनि अहिले बिना सम्झौता हजारौँ रुख काटिएको उहाँको आरोप छ । 

यसैगरी पाथिभरा सामुदायिक वन उपभोक्ता समितिका अध्यक्ष डिकबहादुर बानियाँलेसमेत गुराँस वन फँडानी भइरहेको बताउनुभयो ।