काठमाडौँ । अन्तरिम सरकारका प्रधानमन्त्री सुशीला कार्कीलाई नेपालका लागि चिनियाँ राजदूत छन सोङले बधाई दिनुभएको छ । 

छिमेकी मुलुक चीनले ढिलो गरी प्रधानमन्त्री कार्कीलाई बधाई दिएको हो।  चिनियाँ राजदूत सोङले बिहीबार सिंहदरबार पुगेर कार्कीलाई बधाई दिनु भएको हो । 

उहाँले प्रधानमन्त्री कार्कीलाई भेट्न पाउँदा ठूलो खुशी लागेको बताउनुुभएको छ ।  ‘उहाँलाई हार्दिक बधाई दिँदै समर्थन प्रकट गरियो’, राजदूत सोङले भन्नु भएको छ ।  ‘दुवै पक्षबीच विचार विनिमय हुँदै मित्रता र सहकार्यलाई अझै प्रगाढ बनाउँदै लैजाने सहमति भएको छ।’

तर भदौ २७ मा प्रधानमन्त्री बनेकी कार्कीलाई चिनियाँ प्रधामन्त्री ली छ्याङ र राष्ट्रपति सी चिनफिङले अहिलेसम्म औ‍पचारिक रुपमा बधाई दिनुभएको छैन । यसअघि २८ भदौ शनिबार बेइजिङमा भएको नियमित पत्रकार सम्मेलनमा पत्रकारहरूले गरेको प्रश्नको जवाफ दिँदै चिनियाँ विदेश मन्त्रालयका प्रवक्ता लिन चियानले कार्कीलाई बधाई दिनुभएको थियो । त्यसबेला उहाँलाई पत्रकारको प्रश्न थियो– ‘सेप्टेम्बर १२ मा नेपालको पूर्व प्रधानन्यायाधीश  कार्की अन्तरिम सरकारको प्रधानमन्त्री पदमा नियुक्त हुनुभयो । यसबारेमा चीनको टिप्पणी के छ ?’

जवाफमा उहाँले भन्नुभयो कार्की नेपालको अन्तरिम सरकारको प्रधानमन्त्री पदमा नियुक्त भएकोमा चीनले बधाई दिन्छ। उनले चीन–नेपालबीच परम्परागत मित्रता गहिरो र पुरानो रहेको समेत बताउनुभएको थियो । 

भारतीय समकक्षी नरेन्द्र मोदीले  भने कार्की प्रधानमन्त्री हुनेबित्तिकै बधाई  दिनुभएको थियो ।  त्यसपछि गत शनिबार मणिपुर पुगेर कार्की प्रधानमन्त्री भएको खबरले आफूहरू उत्साहित भएको बताउनु भएको थियो ।  भारतीय राजदूत नवीन श्रीवास्तवले शीतल निवासमै पुगेर कार्कीलाई शपथ समरोहै बधाई दिनु भएको थियो । 
बिहीबार मात्रै भारतीय प्रधानमन्त्री मोदी र समकक्षी कार्कीबीच टेलिफोन संवाद पनि भइसकेको छ।

उता पञ्जाबको धर्मशालामा रहेका तिब्बतका धर्मगुरू दलाई लामाले समेत चीनले भन्दा पहिले कार्कीलाई बधाई दिएका छन् । सम्भवतः नेपालका कुनै प्रधानमन्त्रीलाई दलाई लामाको शुभकामना आएको यो पहिलो पटक हो ।