लमजुङ ।  लमजुङको क्व्होलासोथार गाउँपालिका–३ बगुम गाउँमा मंगलबार राति पहिरोले ३ घर पुरिँदा ४ जना बेपत्ता भएका छन् । पहिरोमा परी एकजना घाइते भएका छन् । 

लगातारको वषासँगै घर माथिबाट आएको पहिरोले स्थानीय चित्र घले, रुद्रमान गुरुङ र पञ्चकुमारी गुरुङको घर पुरिएको हो । पहिरोमा परी रुद्रमान गुरुङ, पञ्चकुमारी गुरुङ र उनकी ५ वर्षीया छोरी नम्रता तथा ७ वर्षीया इच्छा गुरुङ बेपत्ता भएका  प्रहरी निरीक्षक थानेश्वर चपाइँले जानकारी दिनुभएको छ । 

अहिले प्रहरी टोली घट्नास्थलमा उद्धारका लागि जाँदैछ ।  रुद्रमान र पञ्चकुमारी ससुरा बुहारी हुन् , इच्छा रुद्रमानका भाइकी नातिनी हुन् । पञ्चकुमारीको छोरो अर्को घरमा सुत्न गएकाले सकुशल छन् । 

क्व्होलासोथार गाउँपालिकाका योजना शाखा प्रमुख चित्र घलेका अनुसार म राति २ः३० बजे पहिरो गएको हो । राति नै प्रहरी चौकी मालिङलाई खबर गरेको उहाँले जानकारी दिनुभएको छ । सडक अवरुद्ध भएकाले गाउँपालिका अध्यक्ष सूर्यप्रसाद गुरुङ, उपाध्यक्ष जमिमाया गुरुङ लगायतको टोली उद्धारको पहलमा लागि घटनास्थलमा जाँदै गरेको उहाँले बताउनुभयो ।  
स्थानीय जुना घलेका अनुसार रुद्रमानकी श्रीमती भने छोरीको घरमा गएकाले  घटनाबाट जोगिएकी छन् । ‘पानी बेस्सरी परिरहेको छ, पहिरो गएको ठाउँमा जान सकिएको छैन’ उहाँले भन्नुभयो– ‘प्रहरी चौकी मालिङबाट दुई प्रहरी राति नै उद्धारका लागि आउनुभएको छ, श्रोतसाधनको अभावले पहिरो पन्छाउन सकिएको छैन ।’ त्यो ठाउँमा ६ वटा घर रहेका छन् । ३ घर भने पहिरोबाट जोगिएका छन् ।