
न्यूयोर्क (अमेरिका) । सबैभन्दा धेरै पुरस्कार राशी भएको विश्वस्तरीय नेपाली गायन र नृत्यका रियालिटी शो ‘मेरो भ्वाइस युनिभर्स’ र ‘मेरो डान्स युनिभर्स’ सिजन–२ को अडिसन अमेरिकाको ओहायोबाट शुरु भएको छ ।
संसारका ५ महादेशमा पर्ने १२ देशका १४ शहरमा तय गरिएका यी अडिसनको शुरुवात अमेरिकाको कोलम्बसबाट जनवरी २५ र २६ मा भएको छ । अमेरिका र क्यानडाका नेपाली गायन तथा नृत्यका प्रतिभा सम्मिलित एक समारोहबीच आयोजक संस्था इन्ट्रा नेसनल वेलफेयर एन्ड सपोर्ट फाउन्डेशनका अध्यक्ष डिल्ली अधिकारीले शुभारम्भ गर्नुभएको थियो ।
विश्वभर छरिएर रहेका नेपाली कलाकारबीच प्रतिस्पर्धा गराइने यी दुवै शोका विजेताले एक करोड, उपविजेताले २५ लाख र तेस्रो हुनेले १० लाख रुपैयाँ पुरस्कार पाउनेछन् । शुभारम्भका अवसरमा आयोजित समारोहलाई सम्बोधन गर्दै फाउन्डेसनका अध्यक्ष अधिकारीले संसारको जुनसुकै कुनामा बसे पनि आफ्नो मौलिक संस्कृतिलाई जीवन्त राख्न प्रयत्न गरिरहनुपर्ने बताउनुभयो । उहाँले नेपालीको अमूल्य संस्कृतिले नै आफूहरुलाई नेपाली बनाएको भन्दै यसलाई जोगाउन विश्वस्तरीय दुई शो शुरु गरिएको जानकारी गराउनुभयो ।
नेपालीको संस्कृतिलाई गीत, सङ्गीत र नृत्यका माध्यमबाट अर्को पुस्तासम्म पुस्तान्तरण गर्ने, यही माध्यमबाट नेपालीको एकतालाई संसारभर मजबुत पार्ने र जहाँसुकै बसे पनि नेपालीलाई नेपालसँग जोड्ने उद्देश्यले गैरनाफामूलक संस्था फाउन्डेसनले यी शो आयोजना गर्दै आएको पनि उहाँले जानकारी दिनुभयो ।
अमेरिकाबाट शुरु भएको अडिसन युरोपका लन्डन र पोर्चुगल, जापानको टोकियो, चीनको हङकङमा फेब्रुअरी १५ र १६ मा हुँदैछ भने अष्ट्रेलियाको सिड्नीमा फेब्रुअरी २३, थाइल्यान्डको बैङ्कक, युएईको दुबईमा फेबु्रअरी २२ र २३ मा हुने जानकारी पनि दिइयो । त्यसैगरी, कतारको दोहामा फेबु्रअरी २१ मा तथा भारतको मुम्बईमा मार्च १ र २ मा अडिसन हुनेछन् ।
यस्तै भारतको सिलगडीमा मार्च ८ र ९ मा अडिसन सम्पन्न गरेपछि नेपालका विभिन्न चार सहर विर्तामोड, पोखरा, नेपालगञ्ज र काठमाडौँमा अडिसन सम्पन्न गरी संसारभरबाट छानिएका प्रतिभालाई फाउन्डेसनले आफ्नै खर्चमा नेपाल लैजाने र बाँकी प्रतिस्पर्धालाई अघि बढाउने छ । दुवै शो नेपाल टेलिभिजनबाट प्रसारण गरिने जानकारी पनि कार्यक्रममा दिइएको थियो ।
अमेरिका र क्यानडाका गीत तथा नृत्यका ६० भन्दा बढी प्रतिभाले भाग लिएको सो अडिसनबाट गीततर्फ छ र नृत्यतर्फ पाँचजना छनोट गरिएको छ । अमेरिकाको फिल्ड अडिसनका लागि निर्णायकमा गायनतर्फ वरिष्ठ सङ्गीतकार सुशील विश्वकर्मा, गायक केशव पौडेल, अर्जुन रसाइली र सङ्गीतकार मुस्कान बलम्पाकी मगर तथा नृत्यतर्फ नायक दिलीप रायमाझी, शङ्कर विसी, रुपेश उप्रेती र पार्वती राई हुनुहुन्छ ।
कार्यक्रममा अध्यक्ष अधिकारीले फाउन्डेशनको संस्कृति विभागको प्रमुखमा पेन्सिलभेनिया निवासी ओमराज गुरुङलाई नियुक्त गरिएको जानकारी पनि दिनुभयो ।
मेरो डान्स युनिभर्सको अमेरिका अडिसनका दिन इन्ट्रा डान्स स्कुल कोलम्बसका विद्यार्थीले समेत आकर्षक नृत्य देखाएका थिए ।
यो खबर पढेर तपाईलाई कस्तो महसुस भयो ?
छुटाउनुभयो कि?
सबैताजा उपडेट
- जाजरकोट केन्द्रबिन्दु भएर ५.५ म्याग्निच्युडको भूकम्प गयो
- रवि लामिछाने र पूर्वडीआईजी छविलाल जोशीलाई थुन्न आदेश
- ‘गणतन्त्रको विकल्प राजतन्त्र हुन सक्दैन’
- नेपालसँगको सम्बन्धलाई ठूलो प्राथमिकता दिएका छौँः प्रधानमन्त्री मोदी
- जनमोर्चाले गणतन्त्र र राष्ट्रियता रक्षाको लागि अभियान थाल्ने
- भारतीय प्रधानमन्त्रीसँग राम्रो कुराकानी भयोः प्रधानमन्त्री ओली
- गृहमन्त्रीको राजीनामा माग गर्दै राप्रपाद्वारा प्रदर्शन
- ‘देश र जनताको सेवामा रातदिन खटिँदा पनि मलाई बर्खास्त गरियो’
- हावाको गतिले घटायो वायु प्रदूषण
- बैङ्कक सोचपत्र २०३० जारी गर्दै बिम्स्टेक शिखर सम्मेलन सम्पन्न