काठमाडौँ ।  सत्तारुढ दल नेपाली कांग्रेसले राष्ट्रियसभा सदस्यमा मधेस प्रदेशबाट सहमहामन्त्री फरमुल्लाह मन्सुर र केन्द्रीय सदस्य आनन्दप्रसाद ढुंगानालाई प्रस्ताव गरेको छ ।   
कांग्रेसको मधेश प्रदेश समितिले वरिष्ठता, कार्यक्षमता, समावेसी समानुपातिकको आधारमा मन्सुर र ढुंगानालाई सिफारिस गरिएको जनाएको छ ।

प्राथमिकताक्रम निर्धारण गरेर ७  नेताको नाम पठाइएको मधेशका कांग्रेस प्रचार विभाग प्रमुख नितेशकुुमार गुप्ताले जानकारी दिनुभएको छ ।  गुप्ताका अनुसार वरिष्ठताको आधारमा पठाइएको सम्भावित सूचीको पहिलो नम्बरमा केन्द्रीय सदस्य ढुंगानालाई राखिएको छ । ढुंगाना कांग्रेसको अनुशासन समितिका संयोजक समेत हुनुहुन्छ । कांग्रेसले उहाँलाई समानुपातिकतर्फको बन्द सूचीमा समेत राखेको थियो ।  समानुपातिक सूचीबाट फिर्ता गरेर अहिले फेरि राष्ट्रियसभाको लागि सिफारिस गरेको हो । 

सहमहामन्त्री  मन्सुरलाई प्राथमिकताक्रममा दोस्रो स्थानमा राखिएको छ । गत निर्वाचनमा समानुपातिक उम्मेदवार बनेका मन्सुर सांसद भने बन्नुभएन ।  कांग्रेसको मधेस प्रदेशले राष्ट्रियसभाको लागि  नागेन्द्रकुमार सर्लाही, राधेचन्द्र यादव वारा, रामचन्द्र तिवारी महोत्तरी, रजिन्द्रबहादुर अमात्य पर्सा र हृदयनारायण यादव रौतहटलाई समेत प्रस्ताव गरेको छ ।  ८ जिल्लाबाट आएका सबै सिफारिसलाई केन्द्रमा पठाइएको प्रचार प्रमुख गुप्ताले जानकारी गराउनुभयो । 

माघ ११ गते हुने राष्ट्रियसभा निर्वाचनका लागि कांग्रेसले सबै प्रदेशबाट नाम संकलन गरेको छ ।  राष्ट्रियसभा सदस्यको लागि अहिलेसम्म विभिन्न ठाउँबाट २७ जना केन्द्रीय सदस्यको नाम प्रस्ताव भएको कांग्रेस मुख्यालयका अधिकारीहरुले जानकारी दिएका छन् । 

राष्ट्रियसभामा फागुन २० गते २० जना सांसदको पदावधि सकिँदैछ । त्यस मध्ये एक जना राष्ट्रपतिबाट मनोनित र १९ जना निर्वाचित गर्न लागिएको हो । निर्वाचनको लागि उम्मेदवारी दर्ता पुस २३ लाई तोकिएको छ ।