काठमाडौँ । सदनको अवरोध खुलाउन सभामुख देवराज घिमिरेले प्रमुख दलका नेताहरुलाई  छलफलमा बोलाउनुभएको छ । सदन अवरोध खुलाउने विषयमा प्रधानमन्त्री निवास बालुबाटारमा भएको छलफलमा प्रमुख दलबीच सहमति हुन नसकेपछि सभामुखले प्रमुख सचेतकहरुको बैठक बोलाउनुभएको हो ।

सदनको अवरोध  खुलाउन यसअघि प्रधानमन्त्री पुष्पकमल दाहाल ‘प्रचण्ड’ को अग्रसरतामा बैठक बोलाइएको थियो ।  प्रधानमन्त्री निवास बालुवाटारमा भएको छलफलमा सहमति नजुटेपछि  सभामुखले प्रमुख सचेतकहरुको बैठक बोलाउनु भएको हो । प्रमुख सचेतकहरुसँगको छलफल सङ्घीय संसद भवन नयाँ बानेश्वरमा हुने सभामुखका प्रेस विज्ञ शेखर अधिकारीले जानकारी दिनुभएको छ । दलहरुबीच सहमति जुट्न नसक्दा प्रतिनिधिसभाका आजको बैठक अहिलेसम्म शुरु हुन सकेको छैन ।

बालुवाटारको बैठकमा  सभामुख घिमिरे, नेपाल कम्युनिष्ट पार्टी (एमाले) का अध्यक्ष केपी शर्मा ओली, नेपाली कांग्रेसका महामन्त्री गगन थापा र नेता कृष्णप्रसाद सिटौलालगायतको सहभागिता थियो ।  नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपाल, उपप्रधानमन्त्री एवम् गृहमन्त्री रवि लामिछानेको उपस्थिती थियो ।

सहकारी ठगी प्रकरणमा उपप्रधानमन्त्री एवं गृहमन्त्री रवि लामिछानेको संलग्नता रहेको आरोप लगाउँदै प्रमुख प्रतिपक्षी कांग्रेसले सदनको कारबाही अवरोध गर्ने बताउँदै आएको छ । दलहरुबीच सहमति हुन नसक्दा प्रतिनिधिसभाको बैठक बस्न सकेको छैन । बैठक आज बिहान ११ बजे बस्ने कार्यसूची थियो ।

सभामुखले आफ्नै दिदीको निधनका कारण झापा जाने कार्यक्रम रद्द गरेर सदन खुलाउन पहल लिनुभएपनि सहमति हुन नसकेको उहाँको सचिवालयले जनाएको छ । सभामुखले सोमबार पनि प्रमुख दलका नेताहरुसँग सिंहदरबारमा छलफल गर्नुभएको थियो । त्यो छलफलमा समेत प्रमुख दलबीच सहमति हुन सकेको थिएन ।