नुवाकोट । म्यागङ गाउँपालिकाको आयोजनामा बागमती प्रदेशस्तरीय अन्तरपालिका पुरुष भलिबल प्रतियोगिता हुने भएको छ ।

म्यागङ गाउँपालिका–५ सामरीस्थित खेलमैदानमा  वैशाख ७ देखि १२ गतेसम्म प्रतियोगिता सञ्चालन गर्न लागिएको हो । बिहीबार गरिएको पत्रकार सम्मेलनमा गाउँपालिका अध्यक्ष आशा तामाङले ‘भलिबल खेलाडीको पहिचान तथा प्रवद्र्धन ः खेल, खेलाडी र क्षमताको संरक्षण’को मुख्य नाराका साथ खेल पर्यटन भित्र्याउने उद्देश्यले प्रतियोगिता आयोजना गरिएको बताउनुभयो ।

प्रतियोगितामा प्रथम हुने पालिकाले ३ लाख ३ हजार ३ सय ३३ रुपैयाँ र दोस्रो हुनेले २ लाख २  हजार २ सय २२ रुपैयाँ पुरस्कार प्राप्त गर्ने आयोजकले जनाएको छ । आयोजकका अनुसार तेस्रो हुने पालिकाले ५० हजार ५ सय ५५ र चौथो हुनेले सान्त्वनास्वरुप २५ हजार ५ सय २५ रुपैयाँ सहित ट्रफी र मेडल प्राप्त गर्नेछन् ।

प्रतियोगितामा सहभागी हुने पालिकाले तीनजनासम्म पालिका बाहिरका खेलाडीलाई समावेश गराउन पाउने नियम आयोजकले बनाएको छ । 

खेलाडीको क्षमता वृद्धि गराउन र अनुभव साटासाटका लागि  २ जना देश तथा विदेशका जो कोही खेलाडीलाई समावेश गराउन पाउने नियम राखिएको प्रतियोगिताको संयोजक विजय गुरुङले बताउनुभयो । प्रतियोगितामा सहभागी हुन प्रदेशका एक सय १९ वटै पालिकालाई टोली दर्ताका लागि आह्वान गरिएको छ ।