मोरङ । कोशी प्रदेशका मुख्यमन्त्री केदार कार्कीले मोरङको रङ्गेलीस्थित सन्थाल बस्तीमा भएको आगलागीबाट पीडित भएकाका लागि बासस्थान निर्माणको पहल गर्ने बताउनुभएको छ ।

पीडित परिवारसँग बिहीबार भेटघाट गरी स्थानीयवासी, प्रदेश सरकार, स्थानीय सरकार र विभिन्न सामाजिक सङ्घसंस्थाको सहकार्यमा वासस्थान निर्माणको पहल भइरहेको उहाँको भनाई छ ।

सन्थाल समुदायको बसोबास रहेको त्यो ठाउँमा  चैत ३ गते भएको आगलागीबाट २३ घर जलेर नष्ट भएका थिए । सन्थाल बस्दै आएको सुकुम्बासी बस्तीका नागरिकले दैनिक रुपमा ज्याला मजदूरी गरेर गुजारा गरिरहेका छन् । 

पीडितसँगको भेटमा मुख्यमन्त्री कार्कीले सो समुदायका नागरिकलाई जग्गा उपलब्ध गराउने कामको अग्रसरता लिन स्थानीय तहलाई आग्रह पनि गर्नुभयो । उनीहरुलाई जग्गा उपलब्ध गराउन सकिएमा सबैको सहयोग र समन्वयमा स्थायी बास निर्माण कार्य थालिने उहाँको भनाई छ ।