काठमाडौँ । सुन तस्करी प्रकरणमा पक्राउ परेका पूर्वसभामुख तथा नेकपा माओवादी केन्द्रका उपाध्यक्ष  कृष्णबहादुर महरालाई हाजिरी जमानतमा छाड्ने तयारी भइरहेको छ । 

पूर्वसभामुख महरालाई जमानतमा छाड्ने तयारी भइरहेको प्रकरण छानविनमा संलग्न प्रहरी अधिकृतहरुले जानकारी दिएका छन् ।  सुन प्रकरणमा पक्राउ महराको प्रहरीको केन्द्रीय अनुसन्धान ब्यूरो(सीआईबी) मा बयान लिनेक्रम जारी छ ।  बयान सकिएपछि महरालाई हाजिरी जमानतमा छाडेर थप अनुसन्धान प्रक्रिया अघि बढाउने तयारी गरिएको सीआईबी स्रोतले जनाएको छ 

प्रहरी कपिलवस्तुबाट महरालाई ५ चैतमा पक्राउ गरेर काठमाडौं ल्याएको थियो । अदालतमा म्याद थप गर्न हाजिर गएका बेला उनको स्वास्थ्य स्थितिलाई ख्याल गर्दै अस्पतालमा राख्न आदेश भएको थियो । सरकारी वकिलमार्फत प्रहरीले उनलाई ७ दिन हिरासतमा राख्न अनुमति मागेपनि अदालतले ४ दिन मात्र स्वीकृति दिएको थियो । अदालतले चार दिन म्याद थप गर्न दिएको अनुमतिसम्बन्धी आदेशमा उनलाई टीबी, युरिक एसिड, प्रोस्टेटको समस्या रहेको उल्लेख छ । अनुसन्धान अधिकृतहरुका अनुसार, कमजोर स्वास्थ्यका कारण महरालाई बयानका लागि ल्याउन, लैजान पनि कठिनाइ भएको छ ।

स्वास्थ्य अवस्थालाई ख्याल गर्दै बयान भइसकेकाले बाहिरै राखेर पनि थप अनुसन्धान गर्न मिल्ने भएकाले सरकारी वकिलको कार्यालयमार्फत महरालाई हाजिरी जमानतमा छाड्न लागिएको अधिकृतहरु बताउँछन् । महराको चिनियाँ तस्कर गिरोहका एक मुख्य पात्र दावोजिन वाङसँग सम्बन्ध देखिएको छ ।