काठमाडौँ । भूमध्यसागरमा एक आप्रवासी डुङ्गा दुर्घटनामा ६ जनाको मृत्यु र ४० जना बेपत्ता भएको संयुक्त राष्ट्रसङ्घले बुधबार जनाएको छ । 

इटालीको मिडियाले लामपेडुसा टापु नजिकै डुङ्गा डुबेको रिपोर्ट गरेको छ ।‘भूमध्यसागरमा नयाँ डुङ्गा दुर्घटनामा अझै धेरैको मृत्यु भएको छ’ ट्युनिसियाबाट सोमबार ५६ जना बोकेर निस्केको डुङ्गा डुबेको उल्लेख गर्दै युएनएचसिआरका इटालीका प्रतिनिधि चियारा कार्डोलेट्टीले एक्समा भन्नुभयो– ‘केही घण्टाको यात्रापछि डुङ्गा बिग्रन र पानी लिन थाल्यो । ६ वटा शव निकालिएको छ, ४० जना हराइरहेका छन् ।’

इटालीका मिडिया रिपोर्ट अनुसार इटालीको तटरक्षक र वित्तीय प्रहरीले लाम्पिओन नामक सानो चट्टानी टापुबाट ६  पुरुष र चार महिलासहित १० जनालाई सुरक्षित निकालेका थिए । उद्धार गरिएकाले जहाज छोड्दा ५६ जना सवार रहेको तर क्षेत्रबाट केवल छ वटा शव – सबै पुरुष – मात्र भेटिएको बताएका छन् ।

एजिआई समाचार एजेन्सीका अनुसार बाँचेका व्यक्तिले बेपत्ता भएका मध्ये केही समुद्रमा खसेको बताएका छन् । आप्रवासी आइभोरी कोस्ट, माली, गाम्बिया र क्यामरुनका थिए । आप्रवासीलाई उद्धार गरेपछि ट्युनिसियाको स्फ्याक्सबाट धातुको डुङ्गामा यात्रा गरेपछि ४० जना आप्रवासीको छुट्टै समूह लम्पेडुसामा अवतरण गरेको एएनएसए समाचार एजेन्सीले जनाएको छ ।

मङ्गलबार लामपेडुसामा कूल २ सय १३ आप्रवासीसहित ५ वटा अवतरण भएका थिए । यसले टापुको स्वागत केन्द्रमा रहेका मानिसहरूको कूल सङ्ख्या दुई सय ३० पुगेको छ । इटालीको गृह मन्त्रालयका अनुसार यो वर्ष अहिलेसम्म ८ हजार ७ सय ४३ आप्रवासी इटाली आइपुगेका छन् । यो गत वर्षको यही अवधिमा आइपुगेका सङ्ख्याभन्दा केही बढी हो । एजेन्सी