भक्तपुर । चाँगुनारायण नगरपालिका–१ स्थित स्वेलडाँडा सडक स्तरोन्नति शुरू भएको छ । 

चाँगुनारायण नगरपालिकाका प्रमुख जीवन खत्रीले  सडक स्तरोन्नतिको आज शिलान्यास गर्नुभएको छ । बागमती प्रदेश सरकारको एक करोड ५० लाख र चाँगुनारायण नगरपालिकाको एक करोड ५० लाख रुपैयाँ गरी समपूरक शीर्षकअन्तर्गत  सडक स्तरोन्नति गर्न थालिएको हो । 

नगर प्रमुख खत्रीले दुवाकोटको विकट मानिने स्वेलडाँडाअन्तर्गतको सडक स्तरोन्नतिको काम भइरहेको बताउनुभयो । बाँकी सडक पनि चालु आर्थिक वर्षभित्र स्तरोन्नति गरिने उहाँको भनाइ छ । नगर प्रमुख खत्रीले निर्माण व्यवसायीलाई निर्धारित समयमै सडक निर्माणको काम पूरा गर्न आग्रह गर्नुभयो । 

चाँगुनारायण–१ दुवाकोट सरस्वतीखेलका वडाध्यक्ष सिजन कार्कीले समपूरक बजेटअन्तर्गत प्रदेश सरकार र नगरपालिकाको लागतमा निर्माण हुने यो सडकले स्थानीयको जनजीवन सहज हुने बताउनुभयो ।  

सडक आउँदो असारभित्र निर्माण सम्पन्न गर्ने गरी सम्झौता भएको छ ।