सुखेत । प्रदेश अस्पताल सुर्खेतमा ‘याथल्याब’सेवा शुरुवात भएको छ । 

वीर अस्पतालका विज्ञसहित प्रदेश अस्पतालको स्वास्थ्यकर्मीको टिमले ‘बाइप्लेन क्याथल्याब’ मेसिन जडान गरेको थियो । त्यो मेसिनबाट बिरामीको एनजिओग्राफी सेवा थालिएसँगै मुटुरोगीहरूको जाँचका साथै क्याथल्याब सेवा समेत शुरु भएको सूचना अधिकारी तथा मेडिकल रेकर्डर अधिकृत विनोद बस्नेतले जानकारी दिनुभएको छ ।  

फागुन ५ गतेदेखि शुरु भएको सेवा अब नियमित हुने उहाँले बताउनुभयो । कर्णालीका नागरिकलाई जटिल खालको  उपचार सेवा प्रदान गर्न त्यो मेसिन खरिद गरिएको उहाँले जानकारी दिनुभयो  ।  

यसबाट हृदयघात तथा  पक्षघात लगायत जोखिमबाट व्यक्तिलाई बचाउन मद्दत गर्ने उहाँले बताउनुभयो । विशेषगरी मुटुका बिरामीका लागि त्यो मेसिन प्रभावकारी हुने गर्छ । ११ करोड रुपैयाँ लागतमा  मेसिन खरिद गरिएको हो ।
 
यसबाट रगतको नलीबाट क्याथेटर छिराएर मुटुसम्म पुगेर मुटुको नली ठिक भए÷नभएको जाँच गर्ने, मुटुका विभिन्न अध्ययन गर्ने, बन्द भएको रगतको नली खुलाउनेजस्ता प्रोस्युडर गरिने चिकित्सकहरूले बताएका छन् ।

विगतमा हृदयघात भएपछि हस्पिटलमा छाती चिरेर मुटुको बन्द भएको नलीलाई अरु नलीसँग जोडेर मुटुको रक्तनली सञ्चालन ल्याउनुपर्दथ्यो । यसबाट ‘पोष्ट कम्प्लिकेसन’ आउनसक्ने सम्भावना हुन्थ्यो । 

अब केवल क्याथल्याबमा हात वा खुट्टाको रगतको नलीबाट क्याथेटर छिराएर बन्द भएको रगतको नली सफा गरेर जाली राखेपछि फेरि रगतको नली पुनःस्थापना गरिने बताइएको छ ।