काठमाडौँ । गठबन्धन सरकारले स्वास्थ्य बीमामा यस अघि दिइएको सुविधा कटौती गरेको छ । स्वास्थ्य बीमा गरेकाहरुलाई  विभिन्न प्रकारका उपचारमा सरकारी अस्पतालमा दिइने सुविधा १० प्रतिशतले कटौती भएको छ । स्वास्थ्य बीमा सुविधा सरकारले माघ १ गतेदेखि लागू हुने गरी १० प्रतिशतले कटौती गरेको हो । 

मुटु उपचारको लागि केही दिनअघि शहीद गंगालाल राष्ट्रिय हृदय केन्द्र,बाँसबारी पुगेका नवलपरासी बर्दघाटका खुमाकान्त न्यौपानेले स्वास्थ्य बीमा सुविधा बाहिर प्रचार गरिए जस्तो सहज नभएको बताउनुभयो । ७५ वर्ष उमेर माथि जेष्ठ नागरिक र १४ वर्ष मुनिका बालबालिका मुटु उपचार निःशुल्क रुपमा हुने व्यवस्था छ । शहीद गंगालाल राष्ट्रिय हृदय केन्द्रमा विपन्नले समेत औषधि बाहेक उपचारमा पैसा नलाग्ने व्यवस्था छ । तर स्वास्थ्य बीमा गरेकाहरुलाई भने उपचारमा त्यो सुविधा लिन झण्झटिलो बनाइएको छ । 

न्यौपानले मुटु उपचार गर्ने क्रममा आफूले विपन्नतर्फको सुविधा लिन खोज्दा अस्पतालको सम्बन्धित फाँटका कर्मचारीले ‘तपाईले विपन्नको कागजात ल्याउनु पर्दैन, बीमाले नै सबै उपचार कभर गर्छ भनेको र उपचार सकिएपछि पैसा तिर्नुपरेको बताउनुभयो ।  न्यौपानेका अनुसार स्वास्थ्य बीमा गर्दा १ लाख रुपैयाँसम्म उपचारमा अस्पतालमा अप्रेशन लगायतका पैसा नलाग्ने  र केही औषधि समेत पाइने भनिएको थियो । न्यौपानेलाई शहीद गंगालाल राष्ट्रिय हृदय केन्द्रमा मुटु उपचार गर्दा औषधि बाहेक ६५ हजार खर्च देखाइयो । अस्पतालले त्यस मध्ये बीमाबाट ४५ हजार रुपैयाँ मात्रै भुक्तानी हुने र त्यसमा पनि १० प्रतिशत बिरामी आफैले व्यहोर्नुपर्ने भन्दै २५ हजार रुपैयाँ तिराएको उहाँले बताउनुभयो ।