सुर्खेत । कर्णाली प्रदेश सरकारका मुख्यमन्त्री राजकुमार शर्माले पदबाट राजीनामा दिने घोषण गर्नुभएको छ । मुख्यमन्त्री शर्माले प्रदेशसभाको आजको बैठकमा सम्बोधन गर्दै त्यसबारे जानकारी गराउनुभएको हो ।

केन्द्रको सत्ता समीकरण परिवर्तन भएसँगै उहाँले पदबाट राजीनामा दिनुभएको हो । कर्णालीमा नेपाल कम्युनिष्ट पार्टी (एमाले) लाई मुख्यमन्त्री दिने सत्तारुढ दलबीच सहमति भएबमोजिम नेपाल कम्युनिष्ट पार्टी (माओवादी केन्द्र) का तर्फबाट मुख्यमन्त्री रहनुभएका शर्माले राजीनाको घोषणा गर्नुभएको हो ।

मुख्यमन्त्री  शर्माले सङ्घ र प्रदेशमा विकसित राजनीतिक अस्थिरताका कारण संसदीय अङ्क गणितको प्रहारमा प्रदेश सरकार रुमलिएको बताउनुभयो । उहाँले सत्ता समीकरणका फेरबदलका कारण नियमित काममा अवरोध भएको समेत अनुभव सुनाउनुभयो ।

‘सङ्घ र प्रदेशमा विकसित राजनीतिक अस्थिरताका कारण नियमित काम गर्न नसक्ने अवस्था आयो’ उहाँले भन्नुभयो– ‘राजनीतिक समीकरणमा भएको परिवर्तनले पटक–पटक विश्वासको मत लिनुपर्ने अवस्था आएको छ ।’

उहाँले कर्णाली प्रदेश समृद्धिका लागि सबै पक्ष सकरात्मक भएर लाग्नुपर्नेमा जोड दिनुभयो । उहाँले आफूले कार्यकालभरी धेरै काम गरेको उल्लेख गर्दैै अझै कतिपय काम चाहेर पनि गर्न नसकेको बताउनुभयो ।

डिजिटल कर्णालीका लागि आवश्यक रणनीति तथा कर्णाली लगानी सम्मेलनका लागि प्रयास भएको उहाँले बताउनुभयो । ‘कर्णालीका २३ स्थानीय तहलाई नमूना बनाउनेतर्फ पनि काम भएका छन्’ उहाँले भन्नुभयो– ‘योजना छनोटलाई बस्तुगत तथा प्रभावकारी बनाइएको छ ।’