पोखरा । गण्डकी प्रदेश  मुख्यमन्त्री सुरेन्द्रराज पाण्डेले पदबाट राजीनामा दिनुभएको छ । उहाँले आज प्रदेश प्रमुखसमक्ष डिल्लीराज भट्टलाई राजीनामा बुझाउनुभएको हो । 

सत्ता साझेदार नेपाल कम्युनिष्ट पार्टी (माओवादी केन्द्र) ले गत फागुन २३ गते सरकारलाई दिएको समर्थन फिर्ता लिएपछि मुख्यमन्त्री पाण्डेको सरकार अल्पमतमा परेको छ । संवैधानिक व्यवस्थाअनुसार समर्थन फिर्ता लिएको ३० दिनभित्र विश्वासको मत लिनपर्ने भए पनि उहाँले त्यसो नगरी पदबाट राजीनामा दिनुभएको हो । विश्वासको मत पाउने अवस्था नरहेपछि राजीनामा दिएको मुख्यमन्त्री पाण्डेले बताउनुभयो । 

कूल ६० सदस्यीय प्रदेशसभामा सरकार बनाउन ३१ सदस्यको समर्थन चाहिन्छ । प्रदेशसभाको सबैभन्दा ठूलो दल नेपाली कांग्रेसका २७, नेपाल कम्युनिष्ट पार्टी (एमाले)का २२ नेपाल कम्युनिष्ट पार्टी (माओवादी केन्द्र) का सात (सभामुखबाहेक), राष्ट्रिय प्रजातन्त्र पार्टीका दुई र एक स्वतन्त्र प्रदेशसभा सदस्य हुनुहुन्छ ।

केन्द्रको सत्ता समीकरण अनुसार एमाले–माओवादी गठबन्धनको पनि सरकार बन्न सक्ने अवस्था छैन । त्यसका लागि राप्रपाको साथ आवश्यक पर्छ । राप्रपा सरकारलाई समर्थन गर्ने, नगर्ने विषयमा अनिर्णित छ । यस्तो अवस्थामा कुनै पनि दलले बहुमत जुटाउन नसके ठूलो दलले अल्पमतको सरकार बनाउन सक्छ। गण्डकीमा कांग्रेस सबै भन्दा ठूलो दलको हो । मुख्यमन्त्री पाण्डेले यही आशयसहित पदबाट राजीनामा दिनुभएको स्रोत बताउँछ । 

यदि प्रदेशसभामा विश्वास गुमाइसकेपछि भने ठूलो पार्टीको भए पनि संसदीय दलको नेता मुख्यमन्त्री बन्न मिल्दैन । त्यही कारण कांग्रेस संसदीय दलका नेता पाण्डेले चलख्याइँ गरेर प्रदेशसभामा विश्वासको मत गुमाउनु अघि नै पदबाट राजीनामा दिनुभएको स्रोतको भनाई छ ।