मुगु । मुगुमा जीप दुर्घटना हुँदा २ जनाको मृत्यु भएको छ । दुर्घटनामा जना घाइते भएका छन् ।  गमगढीदेखि सोरु गाउँपालिकाको सोरुकोटतर्फ जाँदै गरेको कर्णाली प्रादेश ०२–००१ ज ००५९ नम्बरको बोलेरो जीप बुधबार कच्यागाउँ नजिकै दुर्घटना भएको हो । 

जीप सोरु–६ कक्छेगाउँ नजिक रहेको चार मोड भन्ने ठाउँको सडकबाट करिब एक सय मिटर तल खसेको छ । दुर्घटनामा चालकसहित दुई जनाको मृत्यु भएको मुगुका प्रहरी नायव उपरीक्षक वीरेन्द्र थापाले जानकारी दिनुभएको छ । जिल्ला प्रहरी प्रमुख थापाका अनुसार दुर्घटनामा ४ जना घाइते भएका छन् । 

मृत्यु हुनेमा जीप चालक कविराज नेपाली र  पहिचान नखुलेको महिला रहेकी छन् । दुर्घटनामा   मन्जने नेपाली, सर्जन नेपाली , हीरादिङ नेपाली र प्रेम नेपाली घाइते भएका छन् । 
 
जिल्ला प्रहरी प्रमुख थापाले घाइतेलाई उद्धार गरी उपचारार्थ जिल्ला अस्पतालतर्फ ल्याइँदै  गरेकोे जानकारी दिनुभएको छ । थापाका अनुसार घाइते मध्ये  मन्जनेको अवस्था चिन्ताजनक रहेको  छ ।