झापा । झापामा जङ्गली हात्तीको आक्रमणमा क्षति व्यहोरेका हात्तीपीडितले सहयोग नपाएको गुनासो गरेका छन् । यद्यपि डिभिजन वन कार्यालयले उनीहरूको आर्थिक सहयोगका निम्ति प्रयास गरिरहेको जनाएको छ ।

चालु आर्थिक वर्षको साउनयता क्षति व्यहोरेका ५ सय ३३ परिवारले राहत नपाएका हुन् । पाँचजना मृतक परिवारसहित ५ सय ३३ घरपरिवारका लागि  एक करोड २६ लाख ४९ हजार ३ सय ९२ रुपैयाँ राहत रकम उपलब्ध गराउन धरानस्थित वन निर्देशनालयसँग माग गरिएको डिभिजन वन कार्यालयका सूचना अधिकारी अर्चना पुरीले बताउनुभएको छ ।

कार्यालयले पहिलो चरणमा ३ सय २१ र दोस्रो चरणमा २ सय १२ परिवारका लागि राहत रकम माग गरेको उहाँले बताउनुभयो ।  हालसम्म राहत रकम प्राप्त भएको छैन । ‘राहत रकमका विषयमा फोन आइरहन्छ’ उहाँले भन्नुभयो– ‘पीडितलाई चाँडै आउँछ भन्दै आश्वासन दिइरहेका छौँ ।’

गत कात्तिक २ गतेसम्म तीन सय २१ हात्तीपीडित परिवारलाई ५८ लाख २८ हजार ९ सय ४० राहत रकम माग गरिएको थियो भने गत माघ २९ गते थप दुई सय १२ जनाका लागि  ६८ लाख २० हजार ४ सय ५२ रुपैया माग गरिएको थियो । 

राहत माग गरिएकामा पाँचजना मृतकको  ५० लाख, सातजना घाइतेका लागि ८ लाख ५१ हजार ८  सय ९२ रुपैयाँ, चौपाया एक बराबर  १० हजार, विभिन्न घरगोठमा पुर्याएको क्षतिको पूर्तिका लागि २५ लाख ४९ हजार ७ सय रुपैयाँ, भण्डारण गरिएको अन्न क्षति बराबर ६ लाख ८९ हजार ६ सय रुपैयाँ र बालीनालीमा हात्तीले गरेको क्षति बराबर ३५ लाख ४८ हजार २ सय रुपैयाँ रहेको डिभिजन वन कार्यालयले जनाएको छ ।