महोत्तरी । महोत्तरीमा परेको मिटरब्याजीसम्बन्धी  निवेदनप्रति कारबाही गरी ११ करोड १५ लाख रुपैयाँ बढीको मिलापत्र गराइएको छ । 

जिल्ला प्रहरी  प्रवक्ता प्रहरी नायव उपरीक्षक दिलीपकुमार गिरीले दिएको जानकारीअनुसार महोत्तरीका विभिन्न ठाउँबाट आएको अनुचित लेनदेन (मिटरब्याजी) सम्बन्धी विवादमा  ११ करोड १५ लाख ३८ हजार ४ सय ९२ रुपैयाँ को मिलापत्र गराइएको हो । उहाँका अनुसार जिल्लामा कूल दुई हजार आठ सय ३० मिटरब्याज सम्बन्धी निवेदन आएकामा ऋणी र धनी दुवै पक्षलाई बोलाएर एक हजार तीन सय ३९  निवेदनबारे छलफल गराई सात सय ५९ निवेदनमा मिलापत्र गराउन सफल भएर सो रकम बराबरको मिलापत्र गराइएको हो ।

ऋणीबाट साहुद्वारा लिइसकिएको २० बिघा १३ धुर जग्गा पनि तिनै छलफलमार्फत फिर्ता गराउनसमेत सफल भएको प्रहरी नायब उपरीक्षक गिरीले बताउनुभयो । अहिले जिल्ला प्रहरी कार्यालयमा मिटरब्याजी सम्बन्धी निवेदनउपर दैनिक रुपमा निरन्तर छलफल, सुनुवाइ र कारबाही प्रक्रिया तीव्र गतिले अगाडि बढाइएको छ । विभिन्न निवेदनमा मिलापत्र गर्ने÷गराउने सङ्ख्यामा दिनानुदिन वृद्धि भइरहेको छ । 

पछिल्लो एक महिना ९फागुनभरि० मा मात्रै जिल्ला प्रहरी कार्यालय एक सय ८६ निवेदनबारे छलफल गराउँदा एक सय ५५ निवेदनमा मिलापत्र गराउन सफल भएको हो । ती निवेदनबाट ४ करोड ९० लाख ११ हजार ३ सय ३४ रुपैयाँँ को मिलापत्र र सात बिघा १३ धुर जमिन फिर्ता गराइएको हो ।