काठमाडौँ । नेपाल व्यायाम मन्दिरको आयोजनामा यसै सातादेखि १७औँ धर्मश्री शारीरिक सुगठन प्रतियोगिता हुने भएको छ । 

चैत ७ देखि ९ गतेसम्म हुने प्रतियोगिताको सम्पूर्ण तयारी पूरा भएको आज आयोजित पत्रकार सम्मेलनमा जानकारी दिइएको छ । 

आयोजक संस्थाका अध्यक्ष नारायण प्रधानका अनुसार प्रतियोगिताको मुख्य विधा अर्थात् पुरुष बडिबिल्डिङको रुपमा रहेको धर्मश्रीतर्फ ६०, ६५, ७०, ७५, ८० र ८० किलोमाथिको तौल समूहमा खेलाडीबीच प्रतिस्पर्धा हुनेछ । त्यसपछि हरेक तौल समूहको विजेताबीच ‘मिस्टर धर्मश्री’का लागि प्रतिस्पर्धा गराइनेछ ।

धर्मश्रीसँगै पुरुष एथ्लेटिक्स फिजिक ओभर, मेन्स एथ्लेटिक्स फिजिक अन्डर, महिला बडिबिल्डिङ र ५० वर्षभन्दा माथिको खुला मास्टर विधामा पनि प्रतिस्पर्धा हुनेछ । धर्मश्री विजेता खेलाडीले  १२ लाख, त्यस्तै दोस्रो हुनेले  ६ लाख तथा तेस्रो हुने खेलाडीले ३ लाख रुपैयाँ पुरस्कार पाउनेछन् । त्यसैगरी चौथो हुनेले २ लाख, पाँचौँले १ लाख ८० हजार र छैटौँ हुने खेलाडीले १ लाख ५० हजार रुपैयाँ प्राप्त गर्नेछन् । 

यसैगरी प्रत्येक तौल समूहका उपविजेताले  ५० हजार, तेस्रो हुने खेलाडीले  ४० हजार पाउने, चौथो हुने खेलाडीले . ३० हजार, पाँचौँले  २० हजार र छैटौँ हुने खेलाडीले १५ हजार रुपैयाँ प्राप्त गर्नेछन् । त्यस्तै पुरुष एथ्लेटिक्स फिजिक ओभर र अन्डर तथा महिला बडिबिल्डिङको विजेताले समान जनही  दुई लाख तथा उपविजेताले जनही  एक लाख पाउनेछन् ।

 त्यस्तै तेस्रोले . ७० हजार, चौथोले ५० हजार, पाँचौँले  ४० हजार तथा छैटौँ हुने खेलाडीले  ३० हजार रुपैयाँ प्राप्त गर्नेछन् । पचास वर्षभन्दा माथिको उमेरतर्फ खुला मास्टर विजेताले भने एक लाख पाउनेछन् । दोस्रोले ५० हजार, तेस्रोले  ३० हजार, चौथोले  २५ हजार, पाँचौँले  १५ हजार र छैटौँ हुने खेलाडीले  १० हजार रुपैयाँ प्राप्त गर्नेछन् । 

कमलादीस्थित नेपाल प्रज्ञा प्रतिष्ठानमा आयोजना हुने  प्रतियोगितामा करिब ६ सय खेलाडीले प्रतिस्पर्धा गर्ने आयोजकले जनाएको छ ।