काठमाडौँ । गायिका ज्योति मगर नाच्दा स्टेजमा नै भ्वाङ परेको छ ।  इलामको माइ नगरपालिका आयोजित सिमसार महोत्सवमा ज्योति मगर नाच्दानाच्दै स्टेज भासिएको हो । 

माइ नगरपालिका १ मा बिहीबारदेखि शुरु भएको सिमसार महोत्सवमा ज्योति मगर स्टेजमा उफ्रिँदै नाच्दै गाउँदै थिइन् । त्यही बेला स्टेजमा भासिएर ज्योति मगरको खुट्टा भ्वाङमा छिरेको भिडियो यतिखेर सामाजिक संजालमा भाइरल बनेको छ । 

सामाजिक सञ्जालमा सार्वजनिक भएको भिडियोमा ज्योति मगर गीत गाउँदै नाच्ने क्रममा उफ्रँदा भ्वाङ परेर स्टेजमा लडेको र त्यहाँ धुलो समेत उडेको देखिन्छ । महोत्सव पुस १७ देखि २० गतेसम्म आयोजना भएको हो । 

महोत्सवमा पुस १९ गते राति करिब ११ बजे ज्योति मगरले आफ्नो प्रस्तुति दिएको जनाइएको छ । स्टेजमा भ्वाङ परेर खुट्टा छिरेपछि ज्योतिलाई सुरक्षाकर्मीले उठाएको भिडियोमा देखिन्छ ।  सामाजिक सञ्जालमा राखिएको त्यो भिभियोप्रति विभिन्न खालका टिकाटिप्पणी समेत भइरहेको छ ।