काठमाडौँ । ‘शतप्रतिशत शुद्ध न्यूजील्याण्ड’ डेरी उत्पादन भनी कारोबार गर्दै आएको न्यूजील्याण्डको डेरी कम्पनीमा छापा मारी कारबाही गरिएको छ । 

भारतबाट आयातित नौनी घ्यू बेच्ने तर आफ्नो उत्पादन ‘शतप्रतिशत शुद्ध न्यूजील्याण्ड’ को भएको झूठो दाबी गरेको आरोपमा डेरी कम्पनीलाई कारबाही गरिएको हो ।  न्यूजील्याण्डको वाणिज्य आयोगले डेरी कम्पनी मिल्कियो फुड्स लिमिटेडलाई आफ्नो नौनी घ्यू उत्पत्तिको बारेमा झूठो दाबी गरेको आरोपमा सोमबार दुई लाख ६१ हजार ४५२ अमेरिकी डलर जरिवाना गरेको छ ।

ह्यामिल्टनस्थित त्यो फर्मले भारतबाट घ्यू तथा दुधजन्य सामान आयात गर्ने र ‘शतप्रतिशत शुद्ध न्यूजील्यान्ड’ डेरी उत्पादन जस्ता दाबीका साथ ग्राहकलाई आफ्नो घ्यू उत्पादनबारे झट्टा प्रचार गरी ग्राहकलाई भ्रममा पारेको वाणिज्य आयोगले जारी गरेको विज्ञप्तिमा उल्लेख छ । न्यूजील्याण्डको कृषि–सञ्चालित उद्योगले उच्च गुणस्तरको डेरी निर्यातमा गर्व गर्दछ र विदेशी ग्राहक यसको समृद्ध चरनबाट प्राप्त हुने दूध र मक्खनको लागि लालायित हुने गर्छन् । 

वाणिज्य आयोगका प्रवक्ता भेनेसा होर्नले भन्नुभयो– ‘मिल्कियोले न्यूजील्याण्डमा निर्मित उत्पादन पहिचान गर्न एक विश्वसनीय प्रतीक (फर्नमार्क लोगो)  को प्रतिष्ठाको फाइदा उठाउँदै अन्य उत्पादनलाई बढावा दिएको पाइएपछि जरिवाना गरिएको हो । 

कम्पनीले ‘फर्नमार्क लोगो’ प्रयोगका लागि स्वीकृति प्राप्त गर्न गलत र अपूर्ण जानकारी पनि प्रस्तुत गरेको थियो ।  मिल्कियोले न्यूजील्यान्डको ‘शुद्ध व्यवसाय ऐन (फेयर ट्रेडिङ एक्ट) को धारा १५ उल्लङ्घन गरेको स्वीकार गर्दै उचित अनुमति बिना फर्नमार्क लोगो र लाइसेन्स नम्बर प्रयोग गरेको स्वीकारेको छ ।

होर्नले भन्नुभयो– ‘यो सजायले न्यूजील्यान्ड ब्रान्डलाई झूठो दाबी गर्न खोज्ने अरूका लागि चेतावनीको रूपमा काम गर्नुपर्छ ।”