लमजुङ । अन्नपूर्ण पदमार्गमा एक वर्षमा २१ हजार भन्दा बढी पर्यटक आएका छन् ।  सन् २०२३ मा २१ हजार दुई सय ४७ जना विदेशी पर्यटक आएका हुन् । 

पदमार्गमा एक वर्षको अवधिमा आएका पर्यटकमध्ये १२ हजार ९ सय ८१ पुरुष र ८ हजार २ सय ६६ महिला रहेको अन्नपूर्ण संरक्षण क्षेत्र आयोजना (एक्याप) पर्यटक जाँच तथा सूचना केन्द्र धारापानीले जनाएको छ । 

केन्द्रका इञ्चार्ज भूपेन्द्र गुरुङका अनुसार फ्रान्सका २ हजार ५ सय ३३ पर्यटक आएका थिए । सन् २०२३ मा १ सय २२ देशका नागरिक यस पदमार्गमा आएको उहाँको भनाई छ ।  फ्रान्सपछि इजरायल, जर्मनी, बेलायत, अमेरिकाका नागरिक बढी यस पदमार्गमा आएका थिए । 

सन् २०२२ मा १५ हजार ९ सय विदेशी पर्यटक आएका थिए । त्यस मध्ये १० हजार ३ सय ६४ पुरुष र ५ हजार ५ सय ३६ महिला रहेको  पर्यटक जाँच केन्द्र धारापानीले जनाएको छ । सन् २०२२ यसको तुलनामा सन् २०२३ मा ५ हजार ३ सय ४७ बढी विदेशी पर्यटक आएका छन् । 
       
सन् २०२२ मा आएका पर्यटकमध्ये सबैभन्दा धेरै फ्रान्सका २ हजार १२ थिए । केन्द्रका अनुसार सन् २०२१ मा भन्दा सन् २०२२ मा १३ हजार ६ सय २७ बढी पर्यटक आएका थिए । सन् २०२१ मा १ हजार ५ सय ६२ पुरुष र ७  सय ११ महिला गरी २ हजार २ सय ७३ पर्यटक आएका थिए । 

सन् २०२० मा १ हजार ९ सय ७६ पर्यटक आएको थिए । केन्द्रका अनुसार सन् २०१९ मा ३६ हजार ६  सय ४७ पर्यटक, सन् २०१८ मा २९ हजार ४ सय ८४ पर्यटक, सन् २०१७ मा २१ हजार ६८ पर्यटक पदमार्गमा आएका थिए । 
        
सन् २०१७ बाट पर्यटक आगमनमा वृद्धि हुँदै गर्दा सन् २०२० मा कोरोना सङ्क्रमणको पहिलो लहर आएयता पदमार्ग क्षेत्र नै प्रभावित भएको थियो । अन्नपूर्ण पदमार्गको प्रवेशद्वार लमजुङ बेँसीसहर नगरपालिका– ७ मनाङ्गे चौतारो रहेको छ । यो पदमार्ग लमजुङ, मनाङ, कास्की, मुस्ताङ र म्याग्दी गरी ५ जिल्ला जोडिएको छ । 

पर्यटक हिमाल, पहाडका दृश्य, उच्च पहाड, मनाङवासीको रीतिरिवाज, प्राकृतिक सुन्दरता हेर्नका साथै मनाङबाट मुस्ताङ, पोखरा जान अन्नपूर्ण पदमार्गमा आउने गर्छन् । मनाङमा रहेका हिमाल चढ्न तथा हेर्नका लागि पनि पर्यटक आउने गरेको जनाइएको छ ।