काठमाडौँ । सरकारले आगामी आर्थिक वर्षको बजेटमा सुन, चाँदी, रत्न र आभूषणमा थप कर लगाउने निर्णय गरेपछि त्यसको विरोधमा व्यवसायीहरू आन्दोलनमा उत्रिएका छन्।

शुक्रबार नेपाल सुनचाँदी व्यवसायी महासंघ, नेपाल सुनचाँदी रत्न तथा आभूषण महासंघ, र नेपाल हस्तकला महासंघको संयोजनमा व्यवसायीहरूले आज काठमाडौँको माइतीघर मण्डलाबाट नयाँ बानेश्वरसम्म विरोध र्‍याली निकालेका छन् । र्‍याली नयाँ बानेश्वरमा पुगेर कोण सभामा परिणत भएको थियो।

प्रदर्शनमा व्यवसायीहरूसँगै कलिगढ र मजदुरहरूको समेत उल्लेखनीय उपस्थिति रहेको थियो। उनीहरूले 'अत्याधिक कर हटाऊ, हाम्रो व्यवसाय जोगाऊ', जस्ता नारासहित प्रदर्शन गरेका थिए।

व्यवसायीहरूले सरकारद्वारा सुनचाँदीमा लगाइएको २ प्रतिशत विलासिता कर र रत्न तथा पत्थरमा लगाइएको १३ प्रतिशत कर फिर्ता लिन माग गरेका छन् । व्यवसायीले करबृद्धिका कारण हजारौं श्रमिकको रोजगारी संकटमा पर्ने समेत दावि गरेका छन् । 


महासंघले सरकारसँग तत्काल वार्ता गरेर समाधान खोज्न आग्रह गर्दै, माग सम्बोधन नभए संघर्षलाई अझ व्यापक बनाउने चेतावनीसमेत दिएका छन्।