नेपालकैरन
काठमाडौँ । नेपाली चलचित्रमा अभिनेत्रीको भूमिका प्रायः अभिनेता केन्द्रित हुनेगर्छ । अर्थात् उनीहरू अभिनेताको जोडी बनेर मात्र पर्दामा देखिने गरेका छन् । केही चलचित्रमा मात्र कथालाई लिड गर्ने कार्यभार अभिनेत्रीले पाएका छन् । किनकी धेरै निर्देशक आफ्नो कथाको मुख्यपात्र हिरो अभिनेतालाई नै बनाउने गर्छन् । तर, यसलाई तोड्ने पछिल्लो एक चलचित्र हो, ‘बोक्सीको घर’ । यसमा प्रायः कलाकार महिला छन् ।
केकी अधिकारीले निर्माण गर्नुभएको चलचित्रमा चिनिने अनुहार उहाँ मात्र हुनुहुन्छ । यद्यपि चलचित्रले व्यावसायिक रुपमा सफलता प्राप्त गरिरहेको छ । निर्माण पक्षले उपलब्ध गराएको तथ्याङ्कअनुसार शुक्रबारदेखि सोमबारसम्म चलचित्रको व्यापार ३ करोड २४ लाख रुपैयाँ भइसकेको छ । चलचित्रले चार दिनमै लगानी सुरक्षित गरेर घरेलु बजारमै मुनाफा प्राप्त गरिसकेको छ ।
यो सफलताले केन्द्रीय भूमिकामा महिला कलाकारलाई राखेर चलचित्र निर्माण गर्न अन्य निर्मातालाई हौसला मिलेको छ । अभिनेत्री अधिकारीले कथा मन परेकै कारण यो चलचित्र निर्माण गर्नुभएको थियो ।
‘सोही शीर्षकको नाटक हेरेपछि मैले चलचित्र बनाएर धेरै दर्शकलाई देखाउने निर्णय लिएर आँट गरेकी हुँ । सुरुआती समयमा हिरो (अभिनेता) को हो भनेर नसोधिएको होइन, तर अहिले भइरहेको व्यापारले यसपछिका चलचित्रमा अभिनेत्रीलाई मुख्य भूमिका दिन प्रेरणा मिल्ने छ’ अधिकारीले भन्नुभयो ।
उहाँले आफूलाई प्राप्त हुने अधिकांस भूमिका अभिनेताकै वरपर रहने किसिमको भएकाले ‘बोक्सीको घर’ जस्ता चलचित्रमा लगानी गरेको बताउनुभयो । अभिनेत्री अधिकारी झैँ चलचित्र ‘मनसरा’ मा शीर्ष भूमिकामा अभिनेत्री मिरुना मगर हुनुहुन्छ । स(साना भूमिकामार्फत चलचित्रमा अभिनयको शुरुवात गर्नुभएकी अभिनेत्री मगर अब अभिनेताको वरिपरी घुम्ने पात्रमा आफूलाई प्रस्तुत नगर्ने सोचाइमा हुनुहुन्छ ।
‘आफ्नो पात्रले पार्ने प्रभाव हेरेर म चलचित्र स्वीकार गर्ने कि नगर्ने निर्णय लिन्छु । शीर्ष भूमिकामा आफैँ हुँदा केही दायित्व बढेको महसुस भने हुनेरहेछ’ अभिनेत्री मगरले भन्नुभयो– ‘अब आउँदो समयमा प्रभावहीन भूमिका गर्दिन । किनकि अब अभिनेत्रीलाई अभिनेताकै लागि राख्ने पद्धतिको अन्त्य हुनुपर्छ ।’
अभिनेत्री वर्षा राउतले अभिनेत्रीलाई निर्माता तथा निर्देशकले उपयोग गर्न नसकेको विश्लेषण गर्नुभयो । उहाँ पनि फरक भूमिकाकै पर्खाइमा हुनुहुन्छ । उहाँले भन्नुभयो– ‘हामीले निरन्तर काम गरेनौँ भने हराइने डर हुन्छ । त्यसैले अभिनेत्रीलाई धेरै समय पर्खिने समय छैन । यद्यपि हामीलाई शीर्ष भूमिकामा लिन अहिले पनि निर्माता तथा निर्देशकले बजारको कारण देखाउने गरेका छन् ।’
निर्देशक पुर्नेन्दु झाले नेपालसहित भारतमा बन्ने चलचित्रमा शीर्ष पात्रको रुपमा अभिनेतालाई हेर्न बानी परेको बताउनुभयो । ‘अहिले आइरहेका चलचित्रले विस्तारै अभिनेताको विषयमा स्थापित भाष्यलाई तोड्नेमा विश्वस्त छु’ निर्देशक झाले भन्नुभयो– ‘यद्यपि अहिलेको सन्दर्भमा बजारले पनि निर्देशकलाई केही कठिनाई दिएको छ । हामीलाई निर्माताको लगानी सुरक्षित गराउने दायित्व पनि हुन्छ, त्यसैले सबैको सल्लाहमा काम गर्नुपर्ने हुन्छ ।’
पछिल्लो समय बनिरहेका केही चलचित्रले अभिनेत्रीलाई पनि शीर्ष भूमिकामार्फत प्रस्तुत गरेको छ । यसको व्यावसायिक सफलताले आगामी दिनमा चलचित्रमा अभिनेत्रीको उपस्थितिलाई निर्देश गर्नेछ ।
यो खबर पढेर तपाईलाई कस्तो महसुस भयो ?
छुटाउनुभयो कि?
सबै
ताजा उपडेट
- बिआरआई कार्यान्वयन योजना अन्तिम चरणमा
- कांग्रेस संसदीय दलको बैठक भोलि सोमबार बिहान बस्ने
- समिति गठन नभएसम्म संसद् बैठक अवरोध जारी रहन्छ : महामन्त्री थापा
- गृहमन्त्री लामिछानेको देउवालाई प्रश्न : प्रधानमन्त्री अफरको डेट एक्सपायर भयो कि बाँकी छ ?
- धानलाई मल अभाव हुन्न : कृषि मन्त्रालय
- अवैध ‘प्रिन्स क्रसर’लाई कारवाही गर्न गृह मन्त्रालयको निर्देशन
- पुल एकातिर, खोला अर्कैतिर
- गृहमन्त्री लामिछानेलाई संसदमा बोल्न दिने विपक्षी दलको निर्णय
- प्रतिनिधिसभा बैठक फेरि सर्यो
- बागमतीको नीति तथा कार्यक्रम जेठ १४ गते आउने