बागमती ।  हेटौंडा सिमेन्ट उद्योग व्यवस्थापनले आगामी पुसको पहिलो साताबाट पुनः सिमेन्ट उत्पादन शुरु गर्ने तयारी गरेको छ ।

उद्योग व्यवस्थापनले मङ्सिरमै सिमेन्ट उत्पादन  गर्ने बताएपनि उद्योगको विभिन्न उपकरण मर्मतको काम नसकिदाँ अझै उत्पादन अझै शुरु हुन नसकेको हो । 

‘उद्योगको क्लिनिकलर मेसिन लगायतका उपकरणहरुको मर्मत कार्य अझै भईरहेकै छ’ उद्योग व्यवस्थापन समितिका अध्यक्ष नरेन्द्र भण्डारीले भन्नुभयो– ‘हामीले तिहारसम्ममा मर्मत सकिन्छ र त्यस लग्तै पुनः सिमेन्ट उत्पादको कार्य सुरु गर्ने अनुमान गरेका थियौ ।’ तर अझै उपकरण मर्मतको काम नसकिएकाले उद्योग सुचारु हुन अझै केही दिन लाग्न सक्ने उहाँको भनाई छ । 

उपकरणहरुको मर्मत कार्य सम्पन्न हुने बितिकै आउने पुस महिनाको पहिलो साताबाट सिमेन्ट उत्पादन शुरु गर्ने गरी तयारी भइरहेको उहाँले बताउनुभयो । उद्योग व्यवस्थापनले  असोज १५ गतेदेखि सिमेन्ट उत्पादन बन्द गरेको हो । 

उद्योगको उपकरण बनाउन भारतबाट श्रमिक ल्याउनुपर्ने भएकाले मर्मत सम्भारमा समय लागेको बताउनुहुँदै अध्यक्ष भण्डारीले मर्मत सम्भारको काम तीब्र रुपमा भइरहेकाले छिटै सकिने र त्यस लग्तैबाट उत्पादन शुरु गर्ने तयारी भएको बताउनुभयो ।  ‘हामीसँगै कच्चा पदार्थको कुनै अभाव छैन्’ अध्यक्ष भण्डारीले भन्नुभयो– ‘उद्योगलाई चाहिने करिब चार सय मेट्रिक टन कोइला मौज्दात छ ।’ थप कोइला खरिदको प्रक्रिया अघि बढी सकेको छ, त्यसैले कोइलाको समस्या छैन्, उहाँको भनाई छ । 
    
आर्थिक अभावका कारण यसअघि दुई महिना उद्योग बन्द भएको थियो । गएको भदौ महिनाको तेश्रो साताबाट सिमेन्ट उत्पादन थाले उद्योगले यसअवधिमा ६५ हजार बोरा सिमेन्ट उत्पादन गरेको अध्यक्ष भण्डारीले बताउनुभयो ।  

२०३३ सालमा हेटौंडाको लामसुरेमा स्थापना भएको उद्योगले  २०४३ सालदेखि सिमेन्ट उत्पादन शुरु गरेको थियो ।