काठमाडौँ ।  राष्ट्रिय समाचार समिति (रासस) ले  मैथिली, नेपाल र अवधि भाषामा निःशुल्क समाचार सेवा शुरु गरेको छ । 

राससका कार्यकारी अध्यक्ष धर्मेन्द्र झाको अध्यक्षतामा हालै भएको सञ्चालक समितिको बैठकले  कात्तिक १३ गतेदेखि समितिमा दर्ता हुने मैथिली, नेपाल र अवधि  भाषाका प्रकाशन तथा प्रसारणगृह (छापा, डिजिटल पत्रपत्रिका तथा श्रव्य एवं श्रव्यदृश्य) लाई निःशुल्क समाचार सेवा उपलब्ध गराउने निर्णय गरेको हो । 

मातृभाषाको जगेर्ना गर्ने उद्देश्यले पहिलो चरणमा तीन भाषामा समाचार उत्पादन गरी वितरण प्रारम्भ भएको हो । निःशुल्क समाचार वितरणबाट प्रायः बन्द भएका र हुने अवस्थामा पुगेका  सञ्चारसंस्था यसबाट लाभान्वित हुने अपेक्षा गरिएको छ । बन्द भएका ती भाषाका सञ्चारगृह पुनः सञ्चालनमा आउने र समस्यामा परेका सञ्चार संस्थाले ती भाषामा उत्पादन भएका समाचार प्रकाशन तथा प्रसारण गरेपछि मातृभाषाको संरक्षणमा योगदान पुग्ने विश्वास समितिको रहेको अध्यक्ष  झाले बताउनुभयो । 

मैथिली र अवधि आर्य भाषा हुन् । यी नेपालमा मात्र होइन भारतमा समेत बोलिन्छन् । मैथिली भाषा विशेषगरी मिथिला क्षेत्रका साथै कोशी र मधेश प्रदेशमा बोलिने मूल मातृभाषा हो । नेपालमो सबैभन्दा बढी बोलिने दोस्रा भाषा पनि मैथिली  हो । 

अवधि लुम्बिनी प्रदेशका बाँके, बर्दिया, दाङ, कपिलवस्तु र सुदूरपश्चिम प्रदेशका कैलाली र कञ्चनपुर जिल्लामा बोलिन्छ ।

नेपाल भाषा मुलुकको प्राचीन तथा समृद्ध भाषा हो । यो काठमाडौँ उपत्यका तथा आसापासका क्षेत्र सिन्धुपाल्चोक, मकवानपुर, रामेछाप, काभ्रेपलाञ्चोक, म्याग्दी, तनहुँ, कास्की, सुनसरी, धनकुटा लगायत जिल्लामा बोलिन्छ । 

राष्ट्रिय जनगणना २०७८ अनुसार कूल जनसङ्ख्याको ११ दशमलव शून्य पाँच प्रतिशत अर्थात् ३२ लाख २२ हजार तीन सय ८९ जना मैथिली र अवधि एवं नेपाल भाषा २.९६ प्रतिशत अर्थात् अवधि आठ लाख ६४ हजार दुई सय ७६ र नेपाल भाषा आठ लाख ६३ हजार तीन सय ८० जनाले बोल्ने गरेका छन् । नेपालको कूल जनसङ्ख्या दुई करोड ९१ लाख ६४ हजार पाँच सय ७८ रहेको छ ।  

निःशुल्क समाचार सेवाका निम्ति भद्रकालीस्थित राससको केन्द्रीय कार्यालय, सेवाग्राही शाखाको टेलिफोन नम्बर ०१–५३६२५२१ मा सम्पर्क गर्न सम्बद्ध सबैमा समितिले अनुरोध गरेको छ ।