बागलुङ ।  हरेक कार्यालय, सङ्घसंस्थाले लक्ष्य राखेर काम गर्ने चलन छ । लक्ष्य अनुसार कामको प्रगति पनि हुनुपर्छ । तर आन्तरिक राजस्व कार्यालय बागलुङले पछिल्लो ३ वर्षदेखि नै लक्ष्य भेटाउन सकेको छैन । यद्यपि कर सङ्कलन भने उल्लेख्य रुपमा बढेको छ । 

हरेक आर्थिक वर्षमा लक्ष्यको ७९ देखि ८० प्रतिशत मात्रै कर सङ्कलन भएको छ । केहीवर्ष अघि शतप्रतिशतभन्दा धेरै कर सङ्कलन भएको थियो । आर्थिक वर्ष २०८०/८१ म रु एक अर्ब २० करोड कर सङ्कलन गर्ने लक्ष्य राखेपनि असार मसान्तसम्म कार्यालयले लक्ष्य भेट्न सकेन । बरु ७९ प्रतिशत मात्रै अर्थात् तोकिएको अवधिमा कूल ९६ करोड ५५ लाख ७८ हजार मात्रै कर सङ्कलन भएको कार्यालय प्रमुख प्रमोदकुमार श्रीवास्तवले बताउनुभयो । 

साउन महिनामा आर्थिक कारोबार कम हुने भएकाले सङ्कलन घटेको छ । साउनमा  एक करोड ९३ लाख संकलनको लक्ष्य राख्दा  ९१ लाख  ३५ हजार रुपैयाँ मात्रै सङ्कलन भएको प्रमुख श्रीवास्तवले बताउनुभयो । आव २०७९/८० मा कार्यालयले १ अर्ब पाँच करोड ५१ लाख राजस्व सङ्कलन गर्ने लक्ष बनाएकामा  ९५ करोड ३१ लाख रुपैयाँ मात्रै सङ्कलन गर्न सकेको थियो । लक्ष्य अनुसार कर असुल हुन नसक्नुलाई आर्थिक क्षेत्रको मन्दी, सहकारीमा आम नागरिकको विश्वास घट्नु र लघुवित्तको कारोबारमा आएको कमीलाई औँल्याउने गरिएको छ । बागलुङको हकमा सिवाइसी लघुवित्तको पोखराबाट कारोबार हुँदा यहाँ सङ्कलन हुने लाखौँ रकम सरेको हो । 

त्यस्तै अन्य संस्थाको पनि केही रकम अन्य संस्थामा सरेको छ । ‘सहकारीको कारोबार घट्दा कर सङ्कलन पनि घटेको छ’ प्रमुख श्रीवास्तवले भन्नुभयो । गत आर्थिक वर्ष कार्यालयले ६० करोड ६९ लाख रुपैयाँ आयकर सङ्कलन गर्ने लक्ष्य राखेकामा  ५१ करोड ४९ लाख रुपैयाँ सङ्कलन भएको छ । त्यस्तै भ्याटतर्फ ३३ करोड ४७ लाख रुपैयाँ सङ्कलन गर्ने लक्ष्य रहेकामा  २७ करोड ५० लाख रुपैयाँ मात्रै सङ्कलन भएको छ । अन्तशुल्कतर्फ  पाँच करोड चार लाख सङ्कलन गर्ने लक्ष्य रहेकामा  चार करोड २० लाख रुपैयाँ मात्रै सङ्कलन भएको छ । 

सामुदायिक वन उपभोक्ता समिति, अन्य निर्माण क्षेत्रका उपभोक्ता समिति र कतिपय व्यवसाय नै दर्ता नभएकाले कर सङ्कलन हुन सकेको छैन । त्यस बाहेक असार मसान्तसम्म कैयौँ विकास निर्माण सम्पन्न नभएकाले कर सङ्कलनमा ढिलाइ भएको हो ।