काठमाडौँ । त्रिकोणात्मक टी-२० आई श्रृंखला अन्तर्गत नेपाल र हङकङबीचको दोस्रो खेल वर्षाका कारण रद्द भएको छ । नेपालविरुद्ध घरेलु मैदान मोङ कोकमा टस हारेर पहिला ब्याटिङको निम्तो पाएको हङकङले ८ ओभरमा दुई विकेटको क्षतिमा ६५ रन बनाएको थियो । तर वर्षाका कारण खेल हुन सक्ने अबस्था नभएपछि म्याच रेफ्रिले खेल रद्द भएको घोषणा गरेका हुन् । 

नेपालका लागि करण केसीले पहिलो बलमै विकेट लिएका थिए ।  करणले हङकङका मार्टिन कोट्जेलाई गुल्शन झाको हातबाट क्याच आउट गराए । ७.२ ओभरमा ६१ रन बनाउँदा नेपालmले दोस्रो विकेट लिएको थियो । ८औँ ओभरको दोस्रो बलमा गुल्शन झाले निजाकान्त खानलाई व्यक्तिगत २५ रनमा बोल्ड गरेका थिए ।  त्यसपछि  खेल वर्षाले अवरुद्ध भयो र दुबै टीमले १-१ अंक बाँडे । 

त्रिकोणात्मक टी-२० आई फ्रेन्डसिप कपको पहिलो खेलमा शनिबार नेपाल हङकङसँग ७३ रनले पराजित भएको थियो ।