नयाँदिल्ली । भारतको मध्य प्रदेश राज्यमा सवारी दुर्घटना हुँदा १५ जनाको मृत्यु भएको छ । 

मध्य प्रदेश राज्यमा बिहीबार भएको दुर्घटनामा ५ महिलासहित कम्तीमा १५ जनाको मृत्यु भएको भारतीय प्रहरीले जनाएको छ । दुर्घटनामा २० जना घाइते भएको प्रहरीले जानकारी दिएको छ । मध्य प्रदेश अन्तर्गत मण्डला जिल्ला बिछिया इलाकामा गाडी अनियन्त्रित भई पल्टिँदा दुर्घटना भएको हो । 
 
घाइतेमध्ये केहीलाई स्थानीय अस्पतालमा उपचारका लागि भर्ना गरिएको छ । घाइते केहीको अवस्था गम्भीर रहेकोले मृतकको सङ्ख्या अझै बढ्न सक्ने आशङ्का गरिएको प्रहरीले जनाएको छ । प्रहरीका अनुसार घाइतेहरू त्यही गाउँका हुन् र नजिकैको ठाउँमा आयोजित विवाहपूर्वको समारोहबाट फर्किरहेका थिए ।
 
राष्ट्रपति द्रौपदी मुर्मू, प्रधानमन्त्री नरेन्द्र मोदी र अन्य वरिष्ठ नेताहरूले दुर्घटनामा भएको मानवीय क्षतिप्रति दुःख व्यक्त गर्नुभएको छ ।