काठमाडौँ । शेयर बजारमा निरन्तर कमी आएको छ । 

साता कारोबारको लगातार चौथो दिन बुधबार पनि नेपाल स्टक एक्सचेञ्ज (नेप्से) परिसूचकमा कमी आएको हो । यो साता कारोबारका भएका सबै दिन परिसूचक ओरालो लागेको छ ।

नेप्से परिसूचक आज १४ दशमलव ८८ अंकले घटेर २ हजार ६ सय ८२ दशमलव १५ को विन्दुमा कायम भएको छ । आज ३ सय ११ कम्पनीको ९५ लाख ८३ हजार ८ सय २९ कित्ता शेयर, ५४ हजार ६ सय २२ पटक खरिद बिक्री हुँदा ५अर्ब १४ करोड ३९ लाख ९७ हजार रुपैयाँको कारोबार भएको हो ।    

आजको कारोबारमा होटल तथा पर्यटन, म्युचल फण्ड र व्यापार समूहको उपसूचक बढेको छ भने बाँकी समूहको उपसूचक घटेका छन् । होटल तथा पर्यटन शून्य दशमलव १०, म्युचल फन्ड शून्य दशमलव ०३ र व्यापार समूहको उपसूचक शून्य दशमलव ६० प्रतिशतले बढेको आजको बजारमा अरु सबै समूहका उपसूचक घटेका छन् ।
 
बैंकिङ समूह शून्य दशमलव ५६, विकास बैंक शून्य दशमलव १३, वित्त एक दशमलव ५३, जलविद्युत् शून्य दशमलव ६७, लगानी शून्य दशमलव ४९ र जीवन बिमा समूह एक दशमलव ४८ प्रतिशतले घटेको छ । त्यसैगरी, उत्पादन तथा प्रशोधन शून्य दशमलव ३३, लघुवित्त शून्य दशमलव ४८, निर्जीवन बिमा शून्य दशमलव ५१ र अन्य समूह शून्य दशमलव ५१ प्रतिशतले घटेको छ ।     आजको कारोबारमा मिथिला लघुवित्त वित्तीय संस्था लिमिटेडको शेयर मूल्य सबैभन्दा धेरै नौ दशमलव ३९ प्रतिशतले बढेको छ भने सबैभन्दा धेरै घट्नेमा सामुदायिक लघुवित्त वित्तीय संस्था लिमिटेडको शेयर मूल्य नौ दशमलव २० प्रतिशतले घटेको छ ।    
रकमका आधारमा आज सबैभन्दा धेरै हिमालयन रिइन्स्योरेन्स लिमिटेडको  २९ करोड ६७ लाख ३२ हजार ६ सय ८२ रुपैयाँको शेयर किनबेच भएको छ । 

सङ्ख्याका आधारमा सबैभन्दा धेरै घलेम्दी हाइड्रो लिमिटेडको चार लाख ३५ हजार ६ सय २५ कित्ता शेयर किनबेच भएको छ ।